食環署逼交數 販管隊真離譜

計劃經濟年代，乜都講指標，生產有指標，糧食有指標，消費亦有指標。勢估唔到嘅係，家陣連內地都改行市場經濟，唔再興呢一套，但港府食環署居然人棄我取，古老當時興，連拉小販同捉垃圾蟲都有指標，問你服未。

件事係咁嘅，深水埗區小販管理隊發出通告，指最近冇就《潔淨條例》作檢控嘅隊員，都要記名「照肺」，仲講明凡係冇交數嘅員工都會被評為次等。通告一出，全隊上下人心惶惶，雖然好多人埋怨販管隊製造白色恐怖，但為保飯碗，惟有執行命令狂捉垃圾蟲交數。呢，深水埗區今年一月及二月總共只發出約一百五十張定額罰款通知書，但交數嘅通告一出，淨係三月份就發出過百張，果然係立竿見影，成效顯著。不過咁，呢啲檢控究竟有冇涉及濫告，甚至砌生豬肉，就冇人知嘞。

其實，食環署被指逼下屬交數已經唔係第一次，販管隊以前多次被批評為交數胡亂檢控，而署方就一直否認。今次白紙黑字斷到正，有關官員惟有死死氣承認曾發出通告，但就聲稱只係小隊主管同下屬溝通時用詞不當，唔係逼隊員交數喎。不過，有食環署員工就踢爆，唔排除有人為博表現，做靚業績，要求下屬「嚴謹啲」。

話時話，食環署販管隊係出晒名嘅蛇竇，蛇王多籮籮，所以，署方加強管理冇人話唔啱，問題係，為咗做靚業績而逼下屬交數，咁同弄虛作假又有乜嘢分別？咁豈不是好容易發生冤案？例如差人捉賊，有人為非作歹先至有賊捉㗎，唔通可以隨便拉人交數咩！

講開冤案，唔係杞人憂天o架，事關食環署過去曾經試過「老屈」嘅喇。話說當年有位婆婆出街買雞蛋，撞啱販管隊掃蕩無牌小販，小販聞風走鬼，販管隊捉唔到人，見婆婆拎住盤雞蛋，就唔理三七二十一話人哋係無牌小販，一於落案檢控。叮，買蛋同賣蛋都分唔清，你話幾搞笑吖！

呢位婆婆後來獲律政司撤銷起訴，只係虛驚一場，但有位叫做彭東尼嘅兼職小販就冇咁好彩嘞。佢數年前喺長沙灣擺檔，被食環署販管隊追捕，橫過馬路走避時被貨車撞到重傷，昏迷三個月至醒番，家陣全身癱瘓，仲失咗憶添。叮，掃蕩無牌小販啫，使唔使好似捉賊咁兇惡吖？唔怪得有人將香港食環署同內地城管相提並論，真係一擔擔。

最好笑嘅係，食環署仲成日吹水唔抹嘴，話自己係文明執法喎。唉，如果係文明執法，就唔使逼下屬交數，搞到臭名遠播喇。叮佢個鎯鎯！