彩報殺人不見血　擒賊必須先擒王

有殺無賠！地下六合彩禍延神州，殺人不見血；六合彩報助紂為虐，荼毒同胞。深圳警方日前展開全市大圍剿，成功摧毀一個跨境走私六合彩報同馬經嘅不法集團，當場拘捕廿一人，檢獲三萬幾份曾由淫賤黎旗下公司承印嘅六合彩報《創富》、《六合皇》、《貼士皇》，仲有幾千份爛果報馬經，簡直係大快人心！

地下六合彩肆虐內地多年，害到無數同胞傾家蕩產、家破人亡，有人形容為害己、害人、害親友、害家庭、害民族、害國家嘅「六害彩」，真係一啲都冇講錯。最可怕嘅係，彩禍猶如瘟疫，唔盡快根治，就會不斷滋生，唔止為禍神州，最近仲發展到回流香江，荼毒港人。嗱，警方日前喺油塘一個居屋單位搗破收受地下六合彩賭注中心，揭發內地莊家喺香港招攬「艇仔」，主要向屋邨師奶埋手，彩禍害人，真係無孔不入。

彩禍蔓延中港兩地，賭風愈吹愈烈，罪魁禍首其實就係六合彩報。所謂有賭未為輸，純屬廢話，邊個不幸受到六合彩報迷惑，邊個就注定成為人生大輸家。大家都知喇，六合彩係隨機攪珠，彩報標榜貼士，根本就係呃神騙鬼，最慘係呢啲迷惑人心嘅彩報好似精神鴉片咁，日吸夜食，結果必然沉淪賭海不能自拔。

所以呢，深圳警方今次犂庭掃穴，出動二百警力搗破彩報集團，拉人封艇，值得鼓掌。不過咁，一次行動係冇可能解決所有問題嘅，最緊要持之以恒，窮追猛打，擒賊先擒王，否則，斬草不除根，春風吹又生，不法集團好快又翻生嘅喇。

講開又講，港產六合彩報之所以畀人源源不絕走私北上，如入無人之境，正正因為兩地執法部門長期視若無睹，尤其港府對走私彩報一直闊佬懶理，先至會搞到今日咁嘅地步。呢，早前有立法會議員要求當局關注港產六合彩報不斷走私進入內地，引發連串社會問題，當局居然回應話，二○一○年頭十個月處理咗兩宗走私六合彩報個案喎。

叮！香港六合彩報合法印刷，非法走私內地，幾乎日日發生，早就唔係乜嘢秘密啦，當局十個月先至處理兩宗咁大把，仲唔係失職？唔怪得走私集團愈來愈猖狂，直情當港府冇到啦，有人質疑背後涉及包庇甚至貪污，一啲都唔奇o架。

講到底，當局打擊不力，縱容彩禍肆虐，種下社會動亂禍根，再咁落去，中港兩地都冇運行嘅咋，叮！