通脹猛虎肆虐　民怨遲早爆煲

古人話：苛政猛於虎。現今世界，亦有通脹猛於虎嘅比喻，可見苛政同通脹基本上係連體嬰，嗱，港府就係樣辦喇。

通脹猛於虎，港人苦過弟弟乃不爭事實。講多無謂，數據最能說明一切，香港通脹又創新高喇，三月份綜合消費物價指數上升到百分之四點六，係○八年八月以來新高，回復至金融海嘯前水平。通脹一路係咁升，證明港府成日話如何如何主動出擊抗通脹，根本全部都係吹水唔抹嘴。

最荒謬嘅係，通脹急速升溫，原來港府係罪魁禍首。統計處承認，二月份大幅加煙草稅亦係導致通脹上升嘅元兇之一。財政司司長曾俊華當初與民為敵，企硬唔肯派錢退稅，就係以避免刺激通脹做擋箭牌，但係另一方面預算案就大幅調高煙草稅四成，趕絕貧困老煙民之餘，原來禍害更加波及全港市民。港府政策之自相矛盾，官員之顢頇無能，莫過於此。

通脹加劇，港府有份落井下石，事實上又點止加煙稅一單苛政咁少吖。正如有學者指出，港府身為港鐵最大股東，默許港鐵加價，就係帶頭為公共交通工具掀起加風；預算案大幅加汽車首次登記稅，亦係向通脹火上加油；而縱容樓價狂飆，導致租金上升，更加係通脹禍首。港府不斷助長通脹噬人，罪證如山，官僚卸膊神功就算練到如何爐火純青，呢鋪都賴無可賴。

其實，本來通脹不一定係萬惡，只要政府有為，助民紓困，問題自然可以緩解，之但係，港府黔驢技窮，雞肋新猷「通脹掛鈎債券」早已淪為笑柄。本來派錢六千蚊都算係解基層燃眉之急嘅及時雨，可惜吖，港府死性不改，議而不決，決而不行，派錢方案如何執行、幾時派、點樣派，講嚟講去至今仍然只聞樓梯響，十畫未有一撇，等到市民收錢時，睇怕都被通脹折騰到剩番半條人命咯。

話說回頭，抗擊通脹係一場持久戰，而派錢僅屬一次性措施，根本無濟於事，港府真正要做嘅係制訂全套扶貧政策，解決貧富懸殊同在職貧窮問題。學者警告，通脹率年底或升至百分之八，若來勢太猛太快，將導致經濟泡沫爆破，本港陷入經濟蕭條。學者之慮並非杞人憂天，尤其港府咁無能，好事都可以變壞事，壞事更加變慘事，如果仲一味吹水抗通脹，翹埋雙手唔做嘢，到時遺禍港人，民怨指數只會好似通脹咁隨時爆燈o架咋。叮！