黑心食品殺埋身 港府把關勿造假

唔知撞邪定發瘟，特區高官輪流抱病，管治團隊變病友俱樂部，諗落都幾令人擔心。話晒官老爺健康關乎施政質素，所以勞煩保重身體，尤其要小心飲食呀，萬一唔覺意食咗廣州特色土產「殺蟲劑毒臘肉」，咁就大吉利是o架嘞！

太一叮提醒各位高官防範病從口入，絕對唔係黑心㗎，大家都知啦，內地黑心食品愈搞愈猖獗，愈揭愈恐怖，真係諗起都心驚。本來呢，黑心食品橫行神州，都唔係新聞咯，乜嘢毒奶粉、頭髮豉油、瘦肉精豬肉、染色饅頭，等等等等，早就風行全國，化身百姓碗中嘅家常便飯，見慣不怪。之但係，黑心食品近期瘋狂肆虐與香港一河之隔嘅廣東省，咁就唔到太一叮唔擔心。

唔係危言聳聽，呢，廣州白雲區近日搗破區內最大臘肉工場，揭發奸商用腐爛死豬肉，摻以農藥「敵百蟲」同工業鹽醃製臘肉，當場檢獲三千公斤毒肉。嘩，敵百蟲係殺蟲劑，小量就可以令人中毒，輕則神經錯亂、癡呆癱瘓，重則死亡，好得人驚啫！仲有，廣東其他黑心食品一樣唔嘢少，好似硼砂牛肉、墨汁粉條、染色糯米同工業鹽濃縮雞汁咁，香港人成日北上消費同公幹，隨時中招。

有人或者會諗，唔北上咪無事囉。唉，井水不犯河水啫，河水可以犯井水嗰吓弊呢，廣東黑心食品氾濫成災，而香港同廣東只係隔咗一條小小深圳河，如何獨善其身？以毒臘肉為例吖，有本港業界就指出，不少小型零售商會自行到內地入貨，唔排除有人貪平而將毒臘肉輸入香港，真係防不勝防o架。

內地黑心食品造假功力之高堪稱登峰造極，一旦毒臘肉同墨汁粉條等流入香港，就算「哥士的王子」曾近榮都未必分辨到邊件臘肉滷味摻雜咗化學成分啦！更何況一般小市民？所以，香港相關部門唔該醒醒定定嚴密把關，檢測過程切勿造假得個樣呀。最好就梗係加強抽查，全面堵截黑心食品啦，話晒關乎港人健康咯喎，唔係淨係高官嘅身體先至矜貴o架！

話時話，內地黑心食品賣到通街通巷，隨便一件街邊檔炸雞都可以殺人，令歲半女童死於亞硝酸鹽劇毒之下，奸商草菅人命喪盡天良固然令人髮指，把關部門怠忽職守一樣令人齒冷，最離譜係害人食品可以穿省過市販賣，話無貪官包庇，真係講都無人信。香港防止黑心食品流入，更要提防呢種官場歪風吹襲。叮！