渠蓋炸彈威脅大 官僚笨蛋更危險

小心路邊炸彈！太一叮唔係講緊恐襲危機，而係講緊遍布全港大街小巷嘅十幾萬個雨水渠蓋。由於官僚作風為患，呢批政府公物隨時對路人構成人身威脅，比恐怖襲擊更加防不勝防。

渠蓋安全問題再響警號！今年三月，紅磡必嘉街嘅雨水渠沼氣爆炸，兩個渠蓋好似炮彈咁突然飛彈而起，險傷途人，真係諗起都牙煙。當局調查後懷疑附近食肆違規，將雨水渠當成私家垃圾桶，胡亂傾倒食物殘渣同污水，導致沼氣聚積，釀成奪命危機。

鐵蓋飛彈噴射，萬一不幸傷及途人，非死即傷，唔係講玩。其實渠蓋變路邊炸彈，本港以前爆過好多單o架嘞，最驚險嗰單發生喺○八年，一輛雙層巴士行經觀塘牛頭角道，撞啱車底雨水渠又係沼氣爆炸，重約三十公斤嘅渠蓋炸飛，巴士車底被撞破洞，幸好渠蓋無擊穿車身直入車廂，否則後果簡直不堪設想。

講到呢度，大家或者會問：渠蓋炸彈恍如城市地雷，汽車或途人隨時中招咁鬼恐怖，法例無監控防範嘅咩？唉，唔係無，只係相關部門懶懶閒執法不力啫。法例列明，將污水同食物殘渣棄置公眾地方即屬違法。之但係，多年嚟條例形同虛設，正如區議員批評，食環署等部門一直巡查不力，懶於檢控變相縱容食肆違規，埋下計時炸彈。

更荒謬嘅係，明知罪魁禍首係沼氣積聚造成爆炸，哈，點知路政署傻傻更更，○三年起喺多個衞生黑點嘅雨水渠安裝活門，令渠蓋晴天時自動關閉，導致沼氣更難揮發。當局解釋，活門設計為阻隔渠內蚊蟲同臭氣喎。嗱，呢啲咪叫好心做壞事囉，專家直指路政署戇居，等同自製沼氣室，令爆炸危機大增。

專家之言有根有據o架，嗱，紅磡必嘉街爆炸嘅渠蓋，就係安裝咗呢款活門，話同爆炸完全無關係，正常人類都唔會相信啦。令人擔心嘅係，現時全港十五萬七千個雨水渠蓋中，有五千八百個已經加咗呢種笨蛋設計。即係話，呢批渠蓋炸彈爆發危機更高，殺傷力更大。君子不立危牆之下，危蓋之上一樣不宜久留，日後市民行街自然會帶眼睇蓋，怕只怕香港街道特色乃五步一樓，十步一蓋，避無可避咋！

所以話啫，渠蓋炸彈固然凶險，官僚笨蛋更危險。渠蓋炸彈至今未釀成奇災巨禍實屬萬幸，當局真係要正視問題從速補鑊，萬一出事觸發民憤，被炸到粉身碎骨嘅就係縱容官僚害人嘅港府高層。叮！