藝術品面目全非 文化區難望有成

西九文化區海濱長廊赫然發現大量疑似噴漆塗鴉，五顏六色烏厘馬叉，懷疑遭受刑毀範圍遍及走廊嘅六十幾支座地燈箱，唔通聲援維權藝術家艾未未嘅塗鴉起義再嚟剃港府眼眉？

唔似，唔似。一來燈箱上嘅粗筆殘墨毫無美感，左一撻枯黃、右一撻慘綠，有啲遠睇仲以為係油麻地公廁門上胡亂塗畫嘅惡搞圖畫，效果只會有礙觀瞻惹人討厭。二來當局不聞不問，重案組更加闊佬懶理。吓！乜原來呢批甩皮甩骨慘不忍睹嘅「畫作」，係一班本地藝術家嘅精心傑作嚟㗎？點解搞成咁呀？

咪又係港府嘅傑作囉。話說○五年，當局大鑼大鼓搞咗個叫「藝術創作耀西九」嘅活動，請來約七十位各門各派嘅藝術家即席揮毫，裝飾西九海濱長廊。藝術家全力以赴，有人以繽紛色彩繪畫出香港繁華盛景，亦有人以書法寄意，巧思嘅藝術品一時點亮長廊沿岸。可惜，藝術家昔日嘅精心之作，六年來因為受盡風吹雨打，今日唔係溶溶爛爛，就係甩色風化，面目全非，只剩低幾幅碩果僅存。

港府將西九文化區吹噓為香港未來文藝殿堂，但係門前海濱長廊嘅燈箱藝術品由於缺乏保養而甩皮甩骨，凋零落索，唔止失禮遊客，簡直丟晒香港人嘅架！呢鑊嘢康文署點解釋呢？佢哋話喎，藝術品原定展期為四年，至西九文化區啟用為止，豈料一等六年，以後會加強維修同保養。唉，海濱長廊係露天設計，正常人類都知藝術品一定會受風侵雨蝕㗎啦，當局一直無盡力搶救，依家先至話嚟保養維修，乜都救唔番啦。

心血結晶變成血肉模糊，當日有份付出心血嘅藝術家直言感到心酸，指今次西九海濱長廊藝術品集體被官僚戕害並非偶然，而係反映港府一貫辦藝術嘅能力同心態，直斥官員唔係文盲，而係藝盲，抱住打工心態搞藝術，既勢利又求其，「搞西九（海濱長廊）根本係一場騷」，高潮落幕就乜嘢宏圖大計都拋諸腦後。

嗱，藝術家就講得啱嘞，夕陽港府等收工。其實，計太一叮話齋，何止粉飾海濱長廊係做騷，港府成日誇誇其談要發展文化創意產業，咪一樣係吹水唔抹嘴得個樣，連一條一公里長嘅西九海濱長廊都搞到醜態百出，要發展西九文化區？二百億納稅人血汗錢隨時又係倒落鹹水海㗎咋。香港藝術界不如搞番個塗鴉革命，鬧醒特衰政府啦！叮！