博物館處處趕客 納稅人倒錢落海

博物館保存文物、傳授知識，可謂人文寶庫，不過，如果十室九空乏人問津，職員嘅神聖任務只係日日拍烏蠅，咁展品幾正都無用，白白被糟蹋，博物館只會變成廢物館。從呢個角度睇，康文署轄下啲博物館真係廢廢地o架！

香港成日畀人話係文化沙漠，其實都幾冤枉，單睇博物館同藝術館吖，都為數不少o架，由展出歷史、藝術、海防文物到茶具，林林總總，納稅人支付燈油火蠟都唔知使咗幾多錢，只係物非所值，效益成疑，呢類場地長期遊人稀少，有等如無啫。

本來文物藝術係精神食糧，與商品不同，博物館少人幫襯唔係罪過，之但係康文署用緊嘅係公帑，效益不彰就等如將納稅人啲錢倒落鹹水海，而管理不善導致展出冷冷清清，更加失去傳承文化、啟發民智嘅崇高意義。呢，審計署就曾經炮轟康文署，博物館人流嚴重不足，平均只達預計目標嘅一成，但每年總開支高逾五億元，浪費公帑，要求部門加強管理！

講到呢度，大家或者會問，博物館嘅管理點樣差法，如何趕客呢？嗱，咁講啦，如果你遊覽完博物館，興味盎然，諗住喺禮品店買番幾件紀念品，點知一睇，充斥貨架嘅都係火車模型、音樂盒同水杯等一大堆毫無特色嘅商品，又同展館主題完全無關，九唔搭八，歷史博物館變促銷寄賣店，你話幾咁大殺風景吖。

博物館禮品店亂賣一通，餐廳服務亦令人不敢恭維。如果遊客喺博物館行到腳攰口乾，想話入餐廳攞杯冰水飲飲，可能即刻有侍應索價：「對唔住，加冰兩蚊。」本來兩蚊啫，但係呢種賺錢為先嘅快餐廳經營模式，同博物館擺埋一齊，咪叫煮鶴焚琴囉，又係變相幫博物館趕客。

博物館管理差劣，據聞康文署正諗計補鑊，以後禮品店招標要睇出售嘅商品係咪具博物館特色，年中亦會檢討禮品店同餐廳嘅新定位咁話。而港府早前成立嘅諮詢委員會，更加打算提出整頓方案，構思透過網絡形式將不同嘅博物館，包括鄰近地區如廣州等地嘅博物館連繫起來，提升市民興趣刺激人流。

唉，其實計太一叮話齋，博物館門堪羅雀，展品長期封塵，皆因官僚作風苟且懶散，管理不善，一方面缺乏創意吸引人流，一方面縱容趕客，要根治問題首先整頓咗康文署有關部門先啦，唔係香港只會繼續做文化沙漠o架咋。叮！