彩報毒草燒不盡 官匪勾結是源頭

六合彩報害人不淺！深圳警方日前犂庭掃穴搗破廣東省最大彩報走私集團，檢獲三萬幾份曾由淫賤黎旗下公司為承印人嘅六合彩報《創富》、《六合皇》、《貼士皇》，仲有幾千份爛果報馬經，集團主腦劉氏夫婦等廿一人被捕，法網難逃，抱憾終身。

由於兩地政府長期執法不嚴，地下六合彩肆虐神州，害到無數同胞傾家蕩產、家破人亡，為虎作倀嘅彩報氾濫成災荼毒百姓。嗱，廣東彩報走私集團一夜瓦解，唔代表禍患就此根治，本報記者根據線報，直擊案中驚人內幕，揭發原來彩報勾當真係好猖獗。

案件主腦劉氏本來係廣東河源嘅一對平凡農民夫婦，可惜年前同六合彩報沾上邊後，從此走上不歸路，最初受僱搬運彩報，後來財迷心竅，自行包辦偷運、存倉至零售一條龍「播毒」生產線。一對小農夫妻點解突然咁神通廣大？睇落去自見端倪。

劉氏彩報王國嘅走私路線係咁嘅，每逢香港六合彩攪珠當晚之後嘅凌晨，經大埔、西貢等海邊將港產彩報用大飛偷運上惠州，再用車經過多個鎮後運抵深圳光明，然後先至分售予各地報販，就係咁，搞到廣東彩禍遍地開花。

奇就奇在，呢條黃金走私路線雖然迂迴，但係穿鎮過縣又車又船，多年嚟竟然無出過事喎，港產彩報源源北上如入無人之境，唔通佢哋仲用埋隱形戰機？所以，有前港區人大質疑當中有人包庇、官商勾結，絕對言之成理㗎。太一叮只想作少少補充，製運彩報荼毒同胞嘅人唔算係商人，而係賊匪，所以係官匪勾結至啱！叮！

既然彩報集團涉及貪污包庇，打蛇打七寸，擒賊先擒王，內地當局若然真係想剷除彩毒為民除害咯喎，首先就係要追查幕後黑手挖出禍患源頭。開講都有話啦，野火燒不盡，春風吹又生，彩報勾當利潤豐厚，劉氏夫婦短短幾年間坐擁近億元身家，雖然話係陰騭錢啫，但係有大把淫賤黎之流前仆後繼扑到去賺，一次犂庭掃穴風頭火勢，不法分子或者會暫時收斂，但風聲一過，又會死灰復燃。

仲有呀，取締走私彩報，只有深圳嚴打，而港府繼續闊佬懶理，到頭嚟一樣功虧一簣㗎咋。彩報勾當污糟邋遢，除咗官匪勾結，亦都涉及跨境勾結，深圳把關，香港放行，死得人啦。所以，深圳當局應該唔止要求港方協助緝查彩報集團香港成員，更應要求香港警方全力堵截所有北上彩報。喂，輸出禍源荼毒同胞，呢條罪香港孭唔起㗎！叮！