護士無聲抗議 醫局火頭四起

南丁格爾精神係任勞任怨，服務他人。之不過，加啲想像力諗吓，當呢位提燈女神遇上麻木不仁嘅香港醫管局，要日復一日永無止境捱更抵夜，做死自己更加驚害咗病人，最慘仲係呼天不應叫地不聞，喺咁嘅境況下，你估一百年前嗰盞照亮克里米亞前線傷兵醫院嘅油燈星火仲會唔會一直燃燒傳承至今吖喇？

太一叮咁諗，並非天馬行空浪費精神，事關真係有一班現代南丁格爾忍無可忍，不滿護士人手嚴重短缺，壓力瀕臨爆煲，呢幾日正喺公立醫院聲討緊醫管局高層，呢，咪就係香港護士協會發動嘅一連三日無聲抗議行動囉。行動尋日揭開序幕，護協成員按原定計劃玩轉多間公立醫院，向醫護人員同病人家屬派發印有「嬲爆」、「喪頹」同「勁灰」字樣嘅公仔貼紙，反應踴躍過派米，反映醫管局高層係幾咁不得人心。

護協以「遊戲」方式向醫管局高層施壓，但行動就唔係講玩，衞生服務界立法會議員炮轟，公立醫院護士極度短缺，其中尤以深切治療部、兒科同急性內科最為嚴重，隨時爆煲，要求醫管局加人手、加人工同增加晉升機會。亦有內科病房資深護士趁機踢爆，院方人手編制減少兩成，但病床數目就由三十幾張加到高峰期嘅五十幾張，每日只能流水作業式工作，好多病人投訴被忽略，醫護人員受到嚴重困擾，情緒低落。

唉，呢啲咪叫官逼民反囉。由於公立醫院醫護人手緊張遲遲未解決，前線醫生已揭竿起義發動杏林革命，戰火未息，依家又輪到護士反枱宣戰，醫護荒問題之嚴重，由此可見一斑，而港府同醫管局嘅無能，亦從呢次事件表露無遺。大吉利是講句，如果太一叮收到護協嘅貼紙，一定支持，仲要揀張「嬲爆」嚟貼，一於叮爆食物及衞生局局長周一嶽同醫管局！

其實，護士人手嚴重不足，已非一朝一夕之事，醫護界過往亦多次發預警，高官顢頇啫，但唔係盲㗎，點解睇唔到呢？其實佢哋乜都睇得清清楚楚，只係少做少錯，唔做唔錯，費事孭鑊啫。好嘞，直到最近護協發難，當局就臨急抱佛腳，信口開河承諾增聘一千六百名護士，但係措施力度僅屬隔靴搔癢，護協拒絕收貨，所以先至有今次抗議行動之嘛。

計太一叮話齋，護協印貼紙，唔使整三款咁麻煩啦，只要印一款就搞掂晒，一於「革命」，推翻周一嶽！叮！