中史爆發退修潮　國民教育成空談

以史為鑑，一葉知秋。讀通歷史可以鑑古知今，綜覽中國歷史科喺香港嘅發展興衰，可以睇到啲乜呢？睇穿特區政府做事總係甩甩漏漏、烏厘單刀囉。

「三三四」學制開展一年多，有調查發現，中史科爆發退修潮，雖然九成中學有開辦課程，但修讀人數大跌，近七成受訪學校有新高中生退修個案，人數總共超過三百人，其中一間更多達三十二人退修，幾乎等同一整班人數。

負責調查嘅教育界人士警告，末代會考有多達二萬四千人報考中史，但新高中學制下，剩得一萬二千人修讀，加上退修潮不斷，推算明年首屆新高中文憑試中史科應考生或會跌破一萬人大關，情況非常嚴重。

學生約埋做逃學威龍就聽過，集體退修中史做國史逃兵，太一叮都係第一次見識到，唔係香港學生要對祖國維權人士接連「被失蹤」進行新一波抗議行動吖嘛？哦，調查指，原來學生覺得課程內容太深太多，考評又太難，所以望而卻步。而教育界就直斥中史科嘅課程內容同考核形式設計不當，加上當局無將科目列入初中必修科，學生無基礎，所以讀得辛苦，呢啲都係港府一手造成！

政府自己都講啦，求學不是求分數，讀書要開開心心先至易於吸收，但係當局設計課程背道而馳，令學生望而生畏，呢啲咪叫講一套、做一套囉。國學大師錢穆講過，任何一國之國民，應當對本國歷史心存溫情及敬意。依家中史喺香港淪為閒科，特區官員唔通想做歷史罪人？

最搞笑嘅係，○七年國家領導人南下耳提面命要港府加強青少年國民教育，之後施政報告年年都講，上年仲隆而重之正式將「德育及國民教育科」列入中小學課程。哈，點知呢頭拉客，嗰頭趕客，以認識祖國歷史為經緯嘅中史科，修讀學生買少見少，甚至爆出退修潮，你話係咪諷刺吖？正如教育界批評，如果國史教育淪落，國民教育就欠一隻腳，當局一直將國史教育邊緣化，仲搞乜鬼國民教育吖？根本係自相矛盾，嘥聲壞氣！

嗱，呢啲就係港府特色嘞，推行政策顧得隻鞋又甩咗個髻，總係甩甩漏漏，惹人笑話。所以話啫，香港回歸話晒係中華民族嘅大事，特區政府嘅無能表現好應該寫入史冊，留畀後人以史為鑑。叮！