狙殺拉登多糊塗　《太陽》一出察秋毫

砰砰砰！砰砰砰！恐怖大亨拉登就咁瓜咗，可以同佢嘅死鬼人肉炸彈兵團敍舊話家常。十年前嘅血海深仇如願得報，美軍一嘢將條屍掟落海餵魚，美其名係海葬，實際上毀屍滅迹。

雖然呢一個策動九一一恐怖襲擊嘅大魔頭確係死有餘辜，之不過美國事後嘅處理手法簡直不敢恭維。喂，《時代》雜誌譽為風雲人物嘅網民都奉行一條金科玉律啦，無圖無真相吖嘛，山姆大叔揮軍殺咗拉登咁大件事，居然冇一張半張圖片交代，更加冇短片作為證據，淨係由總統奧巴馬一支公單方面宣布死訊，難怪陰謀論四起啦，叮！

由於無屍顯見私，陰謀論真係千奇百怪乜鬼花臣都有，有人話拉登根本未死，被美軍捉咗去唔知邊個山旮旯地方，有可能係做實驗研究「富家子弟成魔之路」。又有人話拉登係就係死咗，不過唔係死於今次狙殺行動，海豹突擊隊攻入巴基斯坦豪宅賊竇純粹做戲咁做，目的係幫奧巴馬拉票競逐連任。記唔記得連杭思朗登陸月球都有人認為係假嘅？直搗黃龍話就話有當地街坊見到槍林彈雨啫，不排除係自編自導自演嘅煙幕喎。

唔係話賣花讚花香，《太陽報》絕對係洞燭先機，奧巴馬一話成功手刃仇人，《太陽報》馬上頭條報道「殺拉登六大疑團」。嗱嗱嗱，事實上美國愈來愈多輿論質疑拉登已死嘅可信性，紛紛要求白宮公開呢個頭號通緝犯爆頭而亡嘅遺照。所以話啫，太陽一出，明察秋毫，睇完《太陽報》你就唔會人云亦云，更加唔會畀人老點到頭暈暈！

除咗疑團未解，成件事仲有好多烏厘單刀糊塗帳。根據最初嘅版本，拉登手持步槍激烈頑抗，又利用老婆擋子彈做人盾，所以美軍開槍就地正法連斃兩人，後來又改口話當時拉登手無寸鐵，老婆唔係做人盾，仲係只傷未死添。兩個版本出入咁大，會唔會一陣又話拉登死後三天奇迹復活㗎？如果係咁古靈精怪，真係唔叮爆你個鎯鎯都唔得啦！

嗱嗱嗱，咪話太一叮唔提醒大家，雖然備受壓力之下美國有可能公開海葬拉登嘅錄像片段，之不過咁喎，若然條鹹魚好似極端原教旨主義者將良家婦女由頭到腳包到密密實實，鬼知你掟落海嗰個係拉登真身定係吹氣公仔咩！

總而言之點都好，《太陽》一出察秋毫，大家想知道狙殺拉登有乜嘢最新最快最詳盡嘅消息，唔使諗嘞，睇《太陽報》一定可以了解真相！