車場收地官懶理　鐵騎違泊險象生

凡事半桶水成為港府施政嘅特色之一，最低工資爭議、港珠澳大橋環評風波、預算案派錢鬧劇、公眾假期補假漏洞、外遊警示亂象等等，統統因為官老爺無帶腦返工，做到天一半、地一半，最終搞到焦頭爛額。

政經大事漏招甩轆固之然影響深遠，就算係民生小事，一經半桶水嘅港產官僚沾手處理，亦分分鐘小事變大事，大事變慘事。呢，何文田邨最近就經歷咗呢種折騰，居民深感切膚之痛。

事情係咁嘅，何文田邨內本來有一個臨時露天停車場，提供四十個電單車泊位，一向係區內嘅泊車重鎮。但係呢塊官地二月份被勾出拍賣，六月起被收回封場。本來呢，豪宅地皮唔使閒置養蚊，點講都唔係壞事，弊就弊在特區塑化官僚嘅思維好似硬膠一塊死枯枯，做完上半截，就唔理下半場，收番塊地就話之你，對迫遷車主無處落腳嘅頭痛問題一概闊佬懶理，於是造成區內違泊盲流到處充斥。

正如區議員同街坊話齋，何文田邨電單車車位一直嚴重不足，邨內只有一個停車場提供十五個泊位，臨時停車場一夜消失，估計邨內一下子欠缺五十個車位。但係房屋署無安排新泊位填補，而鄰近愛民邨同常樂街嘅車位又遠又唔就腳，於是乎，好多鐵騎士咪貪方便隨處亂泊囉，搞到區內違泊嚴重，有礙觀瞻之餘，更加對途人構成威脅。

講到呢度，官僚部門至少有兩點失當。第一，明知收番臨時車場會導致泊位不足問題雪上加霜，好心當局就做定善後措施啦，例如喺邨內另闢臨時泊位咁，無理由明知大量鐵騎淪為無主孤魂都闊佬懶理。第二，好嘞，就算當局有意將邨內電單車迫遷，咁就唔該警方勤於執法，全力掃蕩違泊行為啦。呢樣唔做，嗰樣唔理，違泊鐵騎紛紛變身路邊僭建物，根本係官僚部門一手造成。

嗱嗱嗱，官僚做嘢天一半、地一半，最終受害嘅又係小市民㗎咋！違泊亂象出現咗兩日之嘛，就有街坊中招嘞。一名晨運婦人尋日行經一條布滿違泊車叢嘅小路時，被電單車絆腳跌倒，頭撼另一輛電單車車尾箱尖角，當場頭破血流，一度情況嚴重，須送院救治。好彩傷者經治療後並無大礙，如果唔係呀，隨時輪到懶惰官僚好似電單車咁被人移走呀。叮！