冒牌專家搵官笨 橋躉移位危機深

本報二月揭發港島交通命脈東區走廊橋躉移位，震驚全港，政府部門對道路基建安全麻痹輕率，危機意識嚴重不足，一鋪露晒底。醜聞呢家嘢通常愈揭愈有，愈揭愈臭，呢次東廊危機亦唔例外。事隔三個月，本報記者又揭出驚人內幕，今次暴露港產官僚對外判工程疏於監管，遺禍無窮。

大家應該記得東廊橋躉不尋常移位嘅元兇，懷疑就係橋躉下面進行緊嘅中環灣仔繞道——威菲車房重置工程，挖掘工程導致泥土流失。令人百思不得其解嘅係，工程點解會出現咁大嘅漏洞？以下發現可能幫到大家解答。

件事係咁嘅，政府將重置工程以招標方式判咗畀一間叫聯益建造嘅公司嚟做，然後聯益再將工程嘅測量工作判畀另一間測量公司承接，即係「判上判」。但係，經本報記者追查，呢間測量公司嘅「高級測量師」竟然係冒牌貨，聲稱所持有嘅竟然只係職業訓練局嘅「測量學文憑」。經查證，所謂嘅「測量學文憑」更加係涉嫌捏造，連冒牌呃飯食都咁唔專業，手上嘅測量工作會係乜嘢結果，可想而知。

離譜事情唔只咁樣，本報記者根據商業登記署資料，揭發測量公司嘅地址竟然係一間陳舊五金製品廠，負責人直認借出地址畀親戚作商業登記，「測量公司」其實只係廠房大閘旁嘅一張寫字枱同埋固網電話等幾件簡單搵食工具。唔好意思，太一叮縱有天馬行空嘅想像力，都無辦法聯想到係一間負責精密測量嘅公司。

講到呢度，正常人一定會質疑：冒牌測量師偽造學歷，會唔會順手偽造埋工程嘅測量數據㗎？如果呢啲質疑不幸言中，整項重置工程咪建築喺一堆錯假數據之上，好牙煙啫！阿Ｑ啲睇，位處於上嘅東廊橋躉依家只係出現變形兼移位，都算係走運咯。

不過，太一叮提醒各位官老爺，阿Ｑ精神勝利法只係自欺欺人，抱住咁嘅態度為官，仲要負責道路基建，喺香港隨時害死好多人。負責政府道路工程嘅外判商有冒牌專家，路政署竟然被搵笨都唔知，簡直懵到上心口。歸根究柢，懶惰官僚外判工程連監管責任都一併外判，不聞不問，疏於監督，畀弄虛作假嘅冒牌貨有機可乘，令交通樞紐埋下行車危機，呢鋪點講都難辭其咎。叮！

正如立法會議員話齋，事件可能影響到整項工程需要重新設計。事到如今，當局必須盡快搵合資格人士審核記錄、重新測量，同埋盡快完成東廊橋躉移位調查報告，千祈唔好再戇居居被搵笨，更加唔可以自欺欺人蒙混過關，叮！