樓價乾升瀕爆煲　港府一味拖又拖

香港樓市長升長有，愈升愈急，連市建局收購市區舊樓都要出到成萬蚊一呎，問你怕未。莫講話八十後九十後，連唔少中產人士都要望樓興嘆，咁政府又有乜應對措施呢？對唔住，慢慢等啦！

煲呔曾前日喺立法會答問大會上承認，本港樓價已經超越九七，升到危險界線，可能產生樓市泡沫，佢係威係勢咁話，需要嘅時候政府會再次出招。咁幾時出招呀？十月份施政報告會研究喎。叮，家陣只係五月份咋，等佢研究得嚟，蛇都死、蚊都瞓啦！

要醫治疾病，必須對症下藥，要治理樓市，必須先搞清楚樓價狂升嘅原因。係人都知，家陣利率超低，市場資金充裕，通脹不斷惡化，加上愈來愈多內地客來港置業，幾樣因素夾夾埋埋，樓價唔狂升至奇。面對咁嘅局面，港府嘅反應就係四個字：束手無策。

冇錯，港府近年的而且確推出唔少招數，可惜多數係花拳繡腿，根本止唔到咳。當局近排吹得最多嘅招數係增加土地供應，仲主動推出土地拍賣添，但事實係，無論當局推出幾多土地都好，始終供不應求，搞到地皮愈賣愈貴，令樓市火上加油。大家試諗吓，麵粉都賣到咁貴咯，麵包有冇可能平吖？呢，有議員就講得啱嘞，增加土地供應未必係解決樓價高企嘅最好方法。

增加土地供應解決唔到問題，咁復建居屋又點吖？對唔住，煲呔曾嘅答覆依然係「No」。佢仲靠嚇咁話，復建居屋會減少私營房屋同公屋嘅土地供應，扭曲市場，可能進一步推高樓價添。叮，呃鬼食豆腐咩！

亦有人提議限制非本地人買樓，呢招係就係有啲國家採用，例如澳洲及新加坡，但不可不知，香港不嬲都係自由港，資金一向自由進出，如果限制非本地人買樓，等於自毀招牌，隨時得不償失，弄巧反拙呀，睇怕港府都冇咁嘅勇氣實行啦。

講來講去，煲呔曾最得意嘅一招就係置安心計劃，佢話呢招比復建居屋更有實效喎。究竟有乜嘢實效呢？所謂實效，咪就係幾年後先至有幾千個單位提供咯，你話係咪得啖笑吖。有人話置安心計劃係杯水車薪，計太一叮話齋，杯水車薪唔緊要，最慘仲係遠水難救近火嗰隻！

其實講乜嘢都係嘥氣，夕陽政府時日無多，成班高官一味等收工，邊度仲有心機做嘢吖。旨意佢哋出招壓抑樓價，等於問和尚借梳，大家不如自求多福好過啦。叮！