油魔左右夾擊　懶官坐視不理

國際油價有升有跌，近月由高位回落，不過，航空客運燃油附加費就好似一架失控客機咁不斷向上衝，有升無降，簡直豈有此理！叮！

香港人鍾意坐飛機遊埠散心，但係一諗起客運燃油附加費係咁起價，人為刀俎，我為魚肉，即時笑唔出。呢嗱，民航處又批准三間航空公司由下月起調高收費嘞，短途每程加至二百三十六元，長途加至一千一百二十四元，加幅分別為百分之六同百分之九，收費水平衝破歷史新高。

國際油價回落，燃油附加費反而逆風而行，今次已經係自上年九月以嚟，三家航空公司第八次獲批加費，市民梗係頂住條氣啦。雖則話調費係滯後反映四月份嘅油價水平，之但係咁，過去九個月油價有上有落，三間公司燃油附加費就只升不跌，情況係咪好荒謬先？仲有，八次加費嘅累計加幅高達一點四倍，遠超國際油價約五成嘅升幅，公眾係咪有理由相信有人借頭借路藉機圖利先？

燃油附加費失控狂飆，手操審批生殺大權嘅民航處難辭其咎。正如立法會議員話齋，就算港府內部嘅民意雷達壞鬼咗，民航處高層枱面都應該有份油價走勢報表啩，有乜理由對航空公司嘅加費申請來者不拒，次次開綠燈？民航處審批申請有如橡皮圖章，監管形同虛設，航空公司唔獅子開大口至奇！叮！

講開又講，港府慷市民之慨，對燃油附加費加價永無托手(月爭)，對車用燃油「加快減慢」更加闊佬懶理。航空公司加燃油附加費都話要經過民航處呢個橡皮圖章，油公司加價簡直就係無王管，搞到運輸業長年飽受油魔煎熬，叫苦連天。

以車用柴油為例，國際原油○八年上過最高峰每桶一百四十五美元，當時香港柴油零售價每公升為港幣十一蚊六毫，而近期油價一度下跌三成至穿破一百美金，但係柴油就賣緊每公升十一蚊六毫九仙，不但無下調，反而仲貴咗九仙！鬼咩，港府一直以「自由市場」為擋箭牌，對油公司肆意起價坐視不理，車用燃油加得快減得慢，價格同國際油價脫軌又有乜出奇！

飛機燃油附加費同車用燃油左右夾擊，無論價格只升不跌抑或加快減慢，根本都係偏離正常航道，一個折騰外遊旅客，一個折騰搵食車司機，懶惰官僚若然繼續袖手旁觀，任由失控，民怨高氣壓愈積愈大，小心遲早機毀人亡。叮！