四日替工十日糧 港府外判真荒唐

「出咗半斤力，想話攞番足八両，家陣惡搵食，邊有半斤八両咁理想」，歌就係咁唱，不過呢，今時今日其實唔只有半斤八両咁理想，出咗半斤力，甚至可以攞番足一斤添吖！

邊度有咁筍嘅工作？呢，港府外判替更工人咪係咯，一個月做四日，就可以出十日糧，除咗香港，睇怕全世界都搵唔到第二份。舊年澳洲大堡礁請環保大使，雖然半年人工有近百萬港元，但要日日開工不特止，仲要每日做足十九粒鐘，你話邊份工最筍呢？

話說本港實施最低工資後，港府承諾向外判合約工人支付最低工資及有薪休息日，同時透過修訂「標準僱傭合約」，訂明工人每七日就享有一日有薪假，由於人工以月薪計，就算工人每周工作一日，亦可享有一日有薪假，以一個月最多有五個星期計，一名替更工人只要每月工作四日，就有十日人工，真係講都冇人信。

查實，以前政府指引列明，按連續性合約受僱嘅僱員，每周須工作十八小時或以上，受僱滿四星期，每七日先至可以至少享有一日假期。唔知當局突然抽咗邊條筋，居然無喇喇將指引中「按連續性合約受僱」呢個條件刪除，咁就過癮咯，如果有人一星期做足七份替工，咁咪可以有七十日人工？叮，仲有冇荒謬啲呀!

話時話，港府不嬲對外判工都係刻薄到冇朋友，任由承辦商層層剝削，令外判工淪為收入最低、最冇尊嚴嘅一群，如果當局良心發現，有心改善外判工嘅待遇，梗係冇人反對喇。問題係，班高官阿茂整餅，冇嗰樣整嗰樣，卒之搞到亂晒大龍，得益嘅只係臨時替工，長期合約工反而完全冇受惠，你話係咪本末倒置呀。

仲有吖，港府忽然大方，始終都係納稅人埋單嘅咋，唔怪得有人怒插港府慷納稅人之慨喇。叮，港府請客，納稅人埋單，班高官梗係唔肉赤啦，如果叫佢哋自己畀錢，睇吓會唔會咁大方！

講開又講吖，最低工資實施咗一個月，仲係亂象叢生，爭拗不斷，好多打工仔未見其利，先受其害，有人甚至冇咗個飯碗添。港府唔諗辦法解決勞資矛盾，反而添煩添亂，簡直九唔搭八。大佬呀，等收工都唔係咁o架，叮！