易拉架嚴重阻街 食環署欺善怕惡

食環署食塞米，官僚作風嚴重，成日應管唔管，唔應管嘅反而去管。早前鬧出長洲罷賣平安包風波，就係食環署無事生非胡亂執法惹嘅禍，最終搞到今年太平清醮唔多太平。

至於食環署應管而無管好嘅例子咯喎，就更加多到數唔晒，今日太一叮只係講一樣啫，就係易拉架阻街問題。

由於食環署掃蕩不力，易拉架氾濫成災，大家行過旺角或者銅鑼灣，可能都見識過有幾咁「架勢」㗎啦，嚴重時成條街亂七八糟，行人搞到好似打木人巷咁要左閃右避。嗱嗱嗱，阻街都係其次，最驚係阻擋司機視線，一個唔覺意釀成意外，咁就大件事。

好嘞，食環署○八年矢言打擊易拉架阻街行為，可惜雷聲大雨點小，平均檢控率一成都唔到。於是乎，署方今年三月變招，改以罰則更重嘅一千五百蚊定額罰款出擊。結果點呢？新罰則實施咗兩個月，各區票控數字極為懸殊，有啲高咗，有啲少咗，而深水埗、南區同葵青區更加至今未開過齋，即係話，檢控數字係零！

咁就神奇嘞，眾所周知深水埗係易拉架重災區，竟然係零檢控，唔通開檔嘅人全部好似印裔阿星咁中咗六合彩頭獎唔使撈，深水埗易拉架絕迹？發夢就會！本報記者直擊黃金商場一帶，發現路邊五步一架、十步一檔，有街坊形容，區內易拉架問題比以前更加嚴重。喂，點解記者隨便行過都發現違規情況，而食環署就檢控唔到？又點解署方提高罰款，易拉架阻街反而更加猖獗？

一句講晒，係人嘅問題。食環署有名「大懶蛇俱樂部」，員工吞泡蛇王疏忽職守係家常便飯，掃蕩易拉架手軟腳軟求求其其，有乜出奇？官僚塞責，執法不嚴，違規者愈嚟愈猖獗，問題愈演愈烈，又何足為奇？所以呢，港府如果真心要打擊易拉架問題，先捉晒食環署裏面班大懶蛇先啦！叮！

講開食環署，執法不力固之然抵鬧，執法雙重標準更加抵打。正如立法會議員批評，食環署面對大企業商業宣傳用易拉架處處留力，對住小本經營嘅阿公阿婆小販則有心有力趕盡殺絕，簡直係厚此薄彼。成語有「擇善而從」，形容人向好嘅學習，但係食環署就練精學懶，一味擇善而管，欺善怕惡，被稱為「大陸城管弱化版」，真係貼切到痹。

唉，食環署懼強鋤弱，專養懶蟲，與其尸位素餐，不如化身易拉架自動摺埋收檔啦，無謂再浪費納稅人金錢嘞，叮！