保殊Man番晒熱火烤熟公牛
熱火三巨頭當中，被指「爛泥扶唔上壁」的大前鋒保殊昨日打出代表作，個人獨取34分協助熱火以96:85屠「牛」，總比數反先2:1。一吐烏氣，保殊賽後大反擊寸爆布沙，明早2人再度交鋒誓必成為焦點！（now635台、有線62及165、廣東體育及中央5台周三早上8:30直播）
唔放布沙在眼內
公牛大前鋒布沙賽前指熱火只得兩位球星，該支常規賽「一哥」昨仗只向勒邦占士及韋迪作嚴密看管，擺明當保殊透明！然而保殊卻大打爭氣波，18投13中攻入全場最高的34分，加上占士及韋迪分別貢獻22及17分，最終熱火主場以11分之差砌低公牛，總比數反超前2:1。
因娘娘腔舉止被嘲似乸型，今年2月頭面對公牛更創下5.6%羞家命中率，保殊今鋪一吐烏氣即刻「Man晒」，賽後占士及韋迪更罕有地齊齊出席記招撐場，保殊隨即向布沙開火：「布沙不放我在眼內，不過我根本不在乎誰人防守我、低估我，現時我已找回自信！」
熱火三巨頭輪流發威，「閃電俠」及「大帝」亦講明願意犧牲數據換取勝利，團結一致，明早鬥公牛有望贏多鋪，主場讓4.5分捧上盤。公牛就禍不單行，中鋒諾亞於比賽中爆粗鬧球迷，極可能被聯盟罰款。
羅斯（右）瞓晒身阻止韋迪射波。（美聯社圖片）
