小恩小惠取巧　港鐵篤數無聊

港鐵發財唔立品，賺大錢之下仲要加價，引起全城噓聲。為咗塞住市民悠悠之口，港鐵煞有介事推出多項優惠，包括送飛及轉乘優惠等，聲稱成個計劃涉及十七億元咁多。叮，唔知嘅畀佢嚇死，知嘅就畀佢笑死。

港鐵今次加價，據講每年可以多賺二億元，今次一口氣推出十七億元優惠，咁豈不是要倒貼？唔通港鐵公司轉咗性肯做善事？唉，如果你真係咁諗，你就太傻太天真喇。

其實所謂十七億元優惠，原來係篤數，大多數優惠現時已經實行緊，今次只不過係延續o架咋。有人計過數，名義上係十七億元優惠，實際只有一億元咁大把，仲要加價半個月後先至推出。最混吉係所謂「搭一百賞一票」計劃，周一至周五搭港鐵滿一百元嘅八達通乘客，會獲贈一張價值三十元嘅單程車票，港鐵吹水話呢項高達三成嘅優惠，會令三十五萬人次乘客受惠喎。

叮，邊度有咁大隻蛤乸隨街跳呀！試諗吓，每個禮拜要搭足五日港鐵，仲要過海線，先至有機會搭滿一百元，然後先至可以獲贈一張車票，你話難度幾高呢？仲有吖，呢張票話就話價值三十元，但只可以搭一程，又唔適用於羅湖及落馬洲過境線，即係話，絕大多數乘客根本冇可能享盡三十元優惠，最多咪搭一程過海車，慳番十元八塊咁大把！

港鐵算死草，推出咁嘅所謂優惠敷衍市民，簡直豈有此理。有位婆婆就鬧得啱嘞，「搭一百賞一票」限制多多，遠不及以前嘅十送一優惠，證明港鐵根本係篤數。有立法會議員更直斥港鐵加價後每年賺多二億元，但只推出一啲小恩小惠，可以講係非常無良。

講開又講吖，港鐵的而且確係幾無良㗎，作為全港最大公共交通機構，而且港府仲係最大股東，港鐵帶頭加價刺激通脹，完全唔顧社會責任，已經夠晒涼薄，依家仲要用篤數嘅手法愚弄市民，咁何止無良呀，直情係無恥啦。

講多無謂，食多會滯，減價最實際。港鐵與其左度右度，度埋啲小恩小惠，不如索性減價，咁咪唔使搞咁多嘢囉。咪話太一叮唔提醒吖，家陣社會矛盾惡化，市民怨氣沖天，港鐵千祈唔好再火上添油，如果唔係，將市民逼上路軌，佢哋自己都冇運行嘅咋，叮！