食物銀行敲警鐘 最低工資累兒童

香港銀行多過米舖，銀行業更加係經濟風向標，無論個人銀行、企業銀行定係投資銀行，若然業績豐收，反映市道差極有限。不過，有種銀行如果客似雲來、業績飆升，咁就唔多老利，太一叮講緊嘅係食物銀行。

食物銀行呢個月客似雲來，其門如市。以聖雅各福群會眾膳坊為例，由本月一日至今，已經接獲八百六十幾宗食物申請，估計月尾埋單計數會增至共約一千六百宗，升幅近一成。香港宣教會恩全鄰舍中心「愛心糧倉」過去兩個月嘅求助者，亦上升咗四分之一，客源不絕。

香港自詡金融中心、國際都會，象徵扶貧嘅食物銀行生意興隆，認真諷刺。因乜解究呢類社福機構由今個月起咁好生意呢？咪拜最低工資所賜囉！新政策千瘡百孔，本月一日勞動節倉卒推出，即刻變成一闋勞工悲歌。社福機構指出，新政策實施後多咗基層勞工失業及更難搵工，當中尤以中年及有小孩子要照顧嘅母親最為嚴重，往往被炒後一家生活頓陷困境三餐不繼，所以咪令到食物銀行業務蒸蒸日上囉。

唉，大人大姐食無情雞固然淒涼，但最可憐嘅仲係嗷嗷待哺嘅小孩子。本報記者直擊兩名受最低工資所害被炒嘅母親，因每日一家幾口僅以幾十蚊開飯，喺通脹夾擊下，真正係巧婦難為無米炊，迫於無奈向食物銀行求助，境況淒涼。其中一家嘅生活簡直聞者心酸，早餐僅靠麵包充飢，四歲女兒想食蝦，咁卑微嘅願望竟因為家貧而變成無法達成嘅奢望，小女兒又奀又瘦，醫生證實患上營養不良。

一場最低工資鬧劇，打工仔未蒙其利，先受其害，依家仲賠上小孩健康，唔通呢樣都係勞工及福利局局長張建宗所講預咗嘅短期陣痛？如果真係，特區官員唔止無能，簡直無情兼冷血。叮！

事實擺在眼前，最低工資陣痛不止，社會承受嘅痛苦正在不斷升級。父母失業，全家受害，兒童係社會未來棟樑，連基本溫飽都成問題，香港有乜嘢前途可言？社福學者就講得啱嘞，基層紛紛向食物銀行索取食物係一個警號，反映社福保障唔夠，令基層被拒諸綜援網外，港府應盡快檢討目前嘅社福政策，保障弱勢社群，真係一語中的。

船到江心補漏遲，最低工資實施至今，後遺症接踵爆發，正如學者所講，港府應該快快補鑊，從社福配套上補漏。不過，港府至今如在夢中等運到，唔通要出現食物銀行大擠提，先至肯做嘢？怕只怕到時後悔已晚，張建宗引咎落台都唔掂呀！叮！