立法會秘書處早前建議喺幾個較為流行嘅社交網站開設戶口，將立法會平時開會片段同活動相片放上網，等市民更容易知道立會訊息，但有關做法可能令議員言論未能受到《立法會（權力及特權）條例》保護，可能面對法律責任問題。不過，尋日內務委員會（內會）仍決定喺下周三大會提出決議案，由行政管理委員會授權秘書處喺社交網站分享立法會資訊，莫非秘書處唔怕議員惹上官非？
立法會內會尋日討論喺社交網站分享立法會資訊問題，商界議員廖長江就擔心，如果秘書處將議員嘅尖銳發言及資料放上社交網站，可能面對法律問題。支持開設社交網站戶口嘅資訊科技界議員莫乃光就話，理解議員擔心可能會面對法律責任，但覺得議員亦有捍衞公眾知情權嘅責任，唔可以又要威又要戴頭盔。
法律顧問馬耀添坦言，暫時未有外國案例列明，當會議內容喺社交網站轉載，議員言論仍然可受特權法保障，所以畀唔到法律意見喎。如果法律問題都未搞清楚，立法會係咪仲要一意孤行、將議員置於法律陷阱呢？
第一手消息請下載on.cc東網
