政壇：搞搞政：遊行進帳少 民陣嗌救命

遊行人數大減，直接影響靠遊行「搵食」籌措經費嘅政團，如公民黨僅籌得七萬元，比去年少咗十一萬元。真普聯同民陣更叫苦連天，事關遊行最貴嘅開支係大會音響及燈光等就要三十幾萬元，民陣埋數估計今年隨時要蝕入肉，真普聯召集人鄭宇碩同公文袋梁家傑等真係有排頭痕！

大遊行一直係泛民政團吸金嘅時機，去年七．一遊行各泛民政團合共籌得二百多萬元，足夠成個政團半年嘅營運開支，難怪有人話泛民當遊行抗議係一盤生意。今年元旦遊行人數大減，加上學民思潮同佔領中環行動等新興組織冒起分薄「水源」，好似學民思潮喺元旦遊行足足擺咗六個街站籌款吸金，成為今年籌款大戶，此消彼長下，白鴿黨、工黨等泛民政黨，只係籌得三至五萬元。

元旦遊行由真普聯同民陣合辦，參加嘅泛民政團要分別向兩者上繳百分之十五及百分之十，今年大家齊齊缺水，民陣召集人楊政賢話，元旦遊行淨開支都要成三十幾萬元，但民陣街站只籌到十九萬元，估計要蝕錢收場。當中最慘情仲係真普聯，因為佢哋日常運作開支都係靠有份參與嘅政團一齊夾錢，早前佢哋因為搞民意調查使大咗，已經幾乎乾塘，鄭宇碩一心諗住靠元旦遊行籌款搵經費，點知人算不如天算，如果參與嘅政團最後又唔肯科水，佢哋真係等摺埋都得喇。