政壇：任志強鬧央視蠢過豬
中央電視台向被視為內地最權威消息發布機構之一，近期卻因為一單發展商拖欠土地增值稅嘅報道捱轟，偏偏《央視》對呢個問題死咬唔放，最近再指控萬科欠交稅款超過四十四億元（人民幣‧下同），素有「任大炮」之稱嘅華遠地產董事長任志強早前已開腔聲討，尋日又喺微博還擊，勁鬧「天下找不到比央視更蠢的豬」。
任志強
最搞笑嘅係，佢嘅言論鋪上微博後，有人留言話央視只係黨同政府嘅喉舌，只管發聲，唔管思考，唔存在蠢不蠢嘅問題，任志強隨即虛心接納意見，將評語略作修正，改為「央視是尺，用來量豬」。
「土地增值稅」風波由一三年延燒到一四年，央視《每周質量報告》舊年十一月話發現四十五間上市房企欠繳三點八萬億元土地增值稅，引起地產商齊齊抗議，當時任大炮已經鬧爆央視「愚蠢同無知」，今次抬出豬嚟鬧，可見任總嘅怒氣。不過，有學者就指，官方喉舌咁樣發炮，反映中央對發展商不滿，亦有網友話，樓價狂升，發展商太過無良，就算央視報道有問題，發展商都唔見得咁乾淨。
