政壇：高佬賢蝦碌打魚瘀到爆
漁農界立法會議員何俊賢（高佬賢）繼上月推出短片介紹元朗有機農莊後，尋日再有新片介紹元朗魚塘，仲教大家點揀靚烏頭魚添。不過，高佬賢防水裝備十足，打起魚上來卻係有姿勢冇實際，莫講話捉烏頭魚，淨係撒網落魚塘已經甩晒轆，瘀爆！
短片中何俊賢話撒網要腰馬合一。（互聯網圖片）
高佬賢喺短片中跟漁民「就叔」學撒網，就叔先示範點樣將魚網撒入魚塘，好輕易就網咗十條八條烏頭魚、黃腳鱲同福壽魚上岸。旁邊嘅高佬賢照辦煮碗，仲懶科學話撒魚網同打網球嘅原理差唔多，千祈唔好用手腕力，一定要用腰力，做到腰馬合一，又話撒網時要用手指尾拉住塊鉛鐵等等，弊在佢撒網似模似樣，起初連就叔都讚佢可以搵到食，點知轉個頭就現晒形，高佬賢突然話：「搵到食呀……不過連條繩都撒埋咗落去」，即係個魚網收唔番上岸，連個魚網都沉落塘底。
撒網不成，高佬賢喺就叔嘅指導下，成功用檸檬蒸烏頭，都算蒸得啱啱好，呢啲算唔算打唔到魚都有魚食呢？
