公信破產拆招牌 《明報》唔衰攞嚟衰

《明報》尋日發表聲明，指中文大學最新一次調查顯示，該報公信力排名下跌，所以報頭相應修改，刪除「公信第一」等字眼。即係咁，欺世盜名畀人篤爆，公信力徹底破產，唔到《明報》唔認衰，但正如網民話齋，《明報》煞有介事發表聲明昭告天下，可能只係懼於商品說明條例咋，否則必定繼續厚住面皮死撐落去o架。

正所謂，真的假不了，假的真不了。《明報》自己搣柴，總算知衰，如果繼續自吹自擂，盞衰多幾錢嘅咋。嗱，如果一份報紙烏龍百出，笑話多多，甚至陰陽怪氣，唯恐天下不亂，仲夠膽厚住面皮話自己「公信第一」，咁就唔只自取其辱咁簡單喇。即係咁，賣花讚花香本來好正常，前提係花必須真係香嘅至可以讚o架，有人明明揸住臭草，居然話係香花，自我陶醉不特止，仲要求其他人認同，問你服未！

話時話，《明報》公信變無信，醜聞多到數極都數唔完。本報翻查歷年資料發現，《明報》每年刊登「更正與澄清」動輒過百次，淨係舊年就有八十四則新聞要「更正與澄清」，其中七十六則新聞仲要向讀者或涉事人「致歉」添。

呢，好似舊年十月一日，《明報》即時新聞網報道特首梁振英等高官先後出席升旗儀式及酒會，唔知攞景定贈興，居然話「特首稍後將辭職」，搞到全城嘩然，好多人仲以為《明報》得到獨家猛料添。點知事隔近兩粒鐘，《明報》又發出「更正及道歉啟事」，承認將特首「將致辭」錯寫成「將辭職」，向讀者致歉喎。

除咗「烏龍第一」，《明報》老作都唔差o架，佢認第二，睇怕都冇人敢認第一。最經典就係當年北京奧運閉幕禮，英國球星碧咸明明喺雙層巴士上一腳踢走個波，《明報》即時新聞網居然繪聲繪色，虛擬「現場直播」，話碧咸由巴士跳落嚟，一邊踢波一邊衝向人群喎。連舉世矚目嘅新聞都可以加油添醋玩老作，呢份報紙有幾多公信力，畫公仔唔使畫出腸嘞啩。

仲有吖，早前免費電視發牌事件搞到滿城風雨，《明報》為求譁眾取寵，引述所謂行政會議文件大事報道，搞到港府要發表聲明澄清，指該份文件根本唔係行會文件，直斥報道錯誤，《明報》又衰多一鑊。

總而言之，群眾眼睛係雪亮嘅，就算《明報》今次唔自己搣柴，市民都當「公信第一」係笑話喇。依家咪好咯，《明報》冇晒公信力，唔需要再扮清高，以後可以擺明車馬老作，可能因禍得福添吖，叮！