政壇：卿姐有經驗瞓街唔使練

立法會議員劉慧卿尋日出席一個電台節目時，話最鍾意睇嘅竟然係外國嘅血腥新聞。佢喺個節目中被問到覺唔覺得香港嘅政治環境複雜咗，佢承認的確係，但覺得香港已經好好彩，皆因大家都算和平理性。佢自爆依家最鍾意睇外國嘅血腥新聞，有人話香港有啲人好激進，對比之下，其實真係差好遠囉。

佢話，經常睇到外國好多地方都好恐怖，全球都驚濤駭浪，香港同外國相比，真係相距幾千里。講到興高采烈，但佢最後都話唔想香港好似外國咁，希望港人要克制喎。

日前元旦遊行結束後，有集會人士喺中環舉行佔領中環演練。卿姐就話自己唔使演練喇，因為佢早喺九十年代抗爭運動中已經瞓過街、被人抬過，睇番以前啲影片就得喇。