「講呢啲」亦係出自呢啲圖片留言，張圖片係無綫老牌藝員劉江喺電視劇《拳王》裏面一個滑稽嘅表情，下面配以字幕「講呢啲」意思相當廣泛，最近似嘅解釋係廣東話中一句「唓…又講埋啲咁嘅嘢！」具體啲即係當被別人一頂高帽笠落嚟，你就可以回應一句:「講呢啲。」又例如有啲人吹水吹到一地都濕晒嘅時候，你大可又回應一句:「講呢啲。」總之用法隨個人喜好。

其實大家有無計過自己一日花多少時間流連社交媒體？隨着智能電話普及化，大家更係無時無刻碌facebook讚好、將地鐵隔籬位嘅醜行影低再upload、八卦一下前度男友嘅動向、或者同一啲三唔識七嘅人網上罵戰，當然唔少得要玩吓game、或將一日四餐post上facebook，證明自己還能正常進食。好多人嘅生活已經離不開facebook，去到睇少陣會死呢個地步，甚至工作嘅主要時間都開住個facebook嘅視窗，方便即時回應。唔知大家有無諗過，如果將玩facebook嘅時間用喺思考之上，或將時間用喺更具建設性嘅事上，係咪會對推動社會發展有幫助？又或者將玩facebook嘅時間放喺身邊至親嘅人身上，生活係咪會快樂一啲？人與人之間係咪會親密啲？無人知……可能你睇到呢度，心中不免會彈出一句:「講呢啲！」

有啲潮語嘅流行，或多或少都同facebook有關。因為facebook去年將留言嘅功能升級，令到用家可以文字留言外，亦能用圖片表達。其實以改圖作為留言，一早已經喺網上討論區流行，依家只係將呢個文化帶到facebook，令到更多人識玩。呢啲潮語改圖通常係cap咗一啲電視劇或動畫中嘅其中一句對白，或者用一啲視頻中嘅定格，配上一句潮語，然後share出嚟。

打開報章雜誌，發現一啲官員或政客回應傳媒提問時嗰種歪理當真理，問非所答嘅時候，就係最想兜口兜面向佢哋講一句:「講呢啲！」

第一手消息請下載on.cc東網iPhone/iPad/Android/Windows Phone Apps