貪曾貪湯搭飛機去觀光，機師恃住自己技術好，同兩位貪心友打賭，如果佢哋成程機，一聲都唔叫，就施捨一千蚊畀佢哋。貪曾貪湯當一聽到個錢字，即刻流晒口水，馬上應承，然後機師使出渾身解數，空中大飄移，反轉再反轉，務求令到隻飛機有咁Chok得咁Chok！廿分鐘後，貪曾同貪湯依然粒聲唔出，機師好佩服兩條友為貪錢咩都做得出，惟有氣餒咁講：「你哋真係大貪喇！」結果貪曾笑到咭咭聲，同機師講：「你認輸未？講個秘密你知，啱啱阿湯跌出飛機嗰陣，我差啲叫咗出嚟呀！」

惡有惡報

貪曾拎住喺機師度貪番嚟嘅一千蚊，一落機就入去夜總會揼骨食鮑魚，畀錢嗰陣，恃住自己有少少錢係威係勢嘅貪曾丟張一千蚊喺地等人執，然後就自信爆棚咁行出門口，豈料，十秒後一班警察從後擒住佢，大叫：「我哋依家要拉你返差館！」貪曾即刻撻朵：「我係曾雀屎呀！你哋冇權拉我！」警察冷笑道：「啱喇！用『匯瘋』假鈔找數，貪開有條路，我哋無拉錯人！」

第一手消息請下載on.cc東網iPhone/iPad/Android/Windows Phone Apps