「虫！」少膽虫一朝早返到公司，就畀淫賤黎嗌咗入房。淫賤黎隨即遞上一疊紙，交到少膽虫手中：「嗱，要破紀錄……」少膽虫盯一盯疊紙，察覺竟然係一份員工名單，仲要水蛇春咁長，當堂驚咗一驚：「腦細，咁大疊名單，唔係要破紀錄……炒……人……呀？」

淫賤黎露出不屑眼神，右手揸滑鼠郁兩郁，開咗條片播放，片中只見一班大頭佛在舞動：「虫，人哋跳兩跳，扭兩扭，就話破咗健力士世界紀錄，真係話都冇咁易……」

以為洞悉一切的少膽虫叻唔切就話：「係咪炒晒班友，一於執咗《爛果》，申請破紀錄先？」「啪！啪！」淫賤黎醒少膽虫兩巴：「幾時話炒人？係叫晒班友仔，連埋你，一齊跳番隻『老舞』威兩威，破一破紀錄，挫吓正義傳媒條氣！」

「腦細真英明！」少膽虫立即擦鞋：「唔使跳『老舞』，我哋都可以申請健力士世界紀錄啦！」淫賤黎一臉茫然，聽唔明少膽虫所謂何解，少膽虫續說：「日日《爛果》即時回收去堆填區嘅紙多到數唔晒，只要我哋肯申請『最短壽命報紙』，實破健力士世界紀錄吖！」

第一手消息請下載on.cc東網iPhone/iPad/Android/Windows Phone Apps