政壇：名人圈2014年爭誕B
社交圈多位名人將喺二○一四年中添B，最早跑出，應該係菁英會主席梁宏正首位公子，「梁B」將於本月中出世，趕得切喺農曆新年逗利是；菁英會成員鄺晶晶，亦喺二月底首次榮升做媽咪；咁蹺菁英會榮譽主席楊華勇亦再次添丁。仲有呀，恒生銀行前女大班梁高美懿（Margaret）嘅細女Angela，都已有六個多月身孕，梁太好快榮升外婆，恭喜恭喜！
鄺晶晶（左）除夕同老公潘偉業喺酒店倒數。（受訪者提供）
梁高美懿（右）同老公梁承達話抱孫係最好嘅新年禮物。
將為人母嘅鄺晶晶心情緊張，七個月前請定陪月員，又因為怕順產太痛，個多星期前突然改變主意想開刀，幸好床位未滿，最終擇定二月底吉日剖腹。晶晶已為囡囡改定英文名Annabelle，寓意係上天嘅禮物。臨盆在即，晶晶只重咗十六磅，佢笑言係肥肚唔肥人，朋友見佢佗得咁輕盈，猜佢腹中寶寶可能係仔都未定喎。
與晶晶情如姊妹嘅楊華勇太太莊菲娜（Fiona），亦喺社交網站宣布有喜。去年初誕下囡囡嘅Fiona，今胎懷男嬰，預產期為五月，名副其實湊成一個好字。楊華勇早前曾自嘲年紀唔細，有仔趁嫩生，話口未完「造人」成功，仲係三年抱兩，但相信最開心嘅一定係佢爸爸楊孫西。
