政壇：佔中未出先癱立會升降機
去年四月有社民連成員趁立法會審議財政預算案期間玩升降機，引起軒然大波，結果被控「干預議員開會」罪，雖然最終被判罰款了事，但相信事件有阻嚇性，唔會再有人敢去玩升降機。不過，尋日下午近一點鐘，正當「佔領中環」行動召集人戴耀廷準備同泛民主派「飯盒會」部分議員商討佔中部署時，立法會一樓會議廳警鐘竟突然誤鳴，連帶所有升降機都即時停止運作。戴耀廷口口聲聲要佔領中環，今次算唔算成功預演「癱瘓」立法會電梯呢？
設計圖片及對白
飯盒會未受影響
升降機雖然只係停駛約十五分鐘，戴耀廷同唔少飯盒會成員早已坐定定等開會，似乎未受升降機停止運作影響。不過，其他大樓內嘅人就冇咁好彩喇，身處五樓嘅職員竟然對警鐘誤鳴懵然不知，大呻若然真係遇上火警，真係齊齊「一鑊熟」。衞生服務界議員李國麟就大講風涼話：「困升降機仲好啦，困住唔使做嘛！」睇嚟李國麟真係唔係好想撈，邊個想出戰下屆衞生服務界功能界別嘅人，就加把勁做好準備喇。
升降機停止運作，玩殘好多人，由於立法會大樓樓底好高，最底兩層更以半層設計，所以樓高十層嘅大樓實際上有十二層樓咁高，唔少議員助理買完外賣飯盒，因為電梯癱瘓要徒步行至少六層樓返議員辦公室開飯。而本身喺九樓開工嘅資訊科技界議員莫乃光，因為只係要行落五樓開會，所以佢就高呼「好彩」飲得杯落，呢啲咪就係自私心態囉。
立法會秘書處事後解畫，承認尋日下午十二點四十六分有樓層響警鐘，檢查後發現有維修人員喺會議廳維修攝影機鏡頭時，意外觸動煙霧感應器，所以引致警鐘誤鳴喎。而保安喺警鐘響起後，已即時前往警鐘響起嘅位置檢查。消防處收到警鐘訊號後，亦即時派消防員到大樓協助。
