摩頓台橋底的灣仔體育總會工程快將完成，預計月底入伙。（受訪者提供）
香港地天橋多，早前就有人倡議，全港二千幾個天橋底都應該好好利用，依家有個別區議員已經喺天橋底開辦事處，但大部分都丟空。香港各界婦女聯合協進會（婦協）主席林貝聿嘉三年前已搵知名建築設計師何周禮（Barrie）設計灣仔鵝頸橋下的婦協總部，結果好評如潮，林太於是再搵Barrie幫手設計銅鑼灣摩頓台橋底嘅灣仔體育總會工程，早前兩人相約落去視察，林太開心又滿意。
林貝聿嘉（左二）相約何周禮（右一）視察灣仔體育總會工程進度。
灣仔鵝頸橋底的婦協總部，都係何周禮嘅設計作品。（資料圖片）
用盡都市剩餘空間
林太話，十多年前當佢出任灣仔區議會主席時，創辦咗灣仔體育總會，後來卸任區議會主席後，就接任總會主席至今。佢話，多年來總會一直寄人籬下，沒有獨立會所，後來佢睇中摩頓台橋底下有一個棄置嘅會所，於是向地政總署申請作為總會的總部，搞咗一、兩年先至獲批。後來佢哋又成功向馬會申請捐助四百萬元搞翻新工程，目前已經幾近完成，預計本月底可以入伙。
林太笑笑口話，自從同Barrie在婦協總部重建項目合作後，大家好有默契，婦協項目設計備受讚揚，Barrie亦攞到唔少獎項。早幾日佢見總會工程初步竣工，所以約埋Barrie落去睇吓，佢覺得好滿意。林太講講吓，諗到總會新居落成後可以搞多啲體育活動，勁開心。
Barrie就話，今次係佢第二個橋底建築設計項目，手頭仲有兩、三個橋底項目，希望以實際行動充分利用高密度都市裏橋底下嘅剩餘空間，唔係齋吹水。佢話，有啲橋底高度成十幾米，可塑性好高。佢好開心鵝頸橋婦協總部可以拋磚引玉，畀市民知道橋底都可以起得咁靚嘅。
第一手消息請下載on.cc東網
