練習簿教壞細路 教育局毀人不倦

呢嗱，香港家長最忌子女輸喺起跑線上，催谷子女嘅其中一個方法，就係購買課外補充練習。不過咁，坊間嘅補充練習良莠不齊，隨時催谷不成起反效果。呢，有供小二學生使用嘅習字簿，內容極盡騎呢，除咗有上述兩句撩交嗌「金句」外，仲有「蠢妻逆子，無法可治」等鬧人粗言，簡直教壞細路。

咁仲唔止，習字簿為咗令每個句子維持八個字嘅格式，不惜將唔同出處嘅古文自行組合，亂點鴛鴦譜。好似其中一句「二人同心，黃土成金」，明顯係將「二人同心，其利斷金」同埋「三人一條心，黃土變成金」攪亂檔。連中文科老師都擔心，出版商不加解釋就自行組合句子，會令學生誤解原意，根本無助學好中文咁話。

其實，莫講話學唔好中文吖，好多補充練習直情連基本常識都搞錯添。呢，一本為小五學生而設嘅常識科練習，講述港府架構時，竟然列出「三司十一局」，又話立法會有「委任議員」同埋「民選議員」，仲話所有區議員都係立法會議員添。實情係，港府架構早就改為三司十二局，而立法會只有功能組別議員同埋民選議員，雖然新增超級區議會議席，但絕對唔代表所有區議員都係立法會議員。練習簿錯得咁離譜，如果學生考試時咁答題，隨時食零雞蛋都似。

可能你會問，乜教育局冇監管嘅咩？冇錯嘞，的確係無王管o架。嗱，教育局原來只負責評審教科書，唔會評審補充練習，頂多只會向出版商發出《優質課本基本原則》作為指引，完全冇約束力，咁就難怪內容錯漏百出喇。所以話啫，部分坊間出版社教壞細路，而教育局放任自流，就係毀人不倦嘅幫兇！

講開又講，本港學生嘅中文水平一直為人詬病，好似今年文憑試咁，中文科達標率竟然仲低過英文科，反映教育政策幾咁失敗。有立法會議員歸咎當局取消中史科作為必修科，學生又唔使讀文言文，中文水平自然一蟹不如一蟹。咁又係呀，有學生竟然將周星馳電影金句當成古語金句，就知問題幾嚴重喇。

咦，教育局好似突然醒悟，拍板決定明年九月高中中文科引入十二篇文言文範文，話要藉此提升學生中文水平喎。係就好喇，怕只怕政策朝令夕改，添煩添亂嘅咋，叮！