政壇：梁愛詩 伍淑清夠晒默契
基本法委員會副主任梁愛詩同全國政協常委伍淑清兩人關係好好，尋日佢哋不約而同出席一個活動，兩人就展現佢哋嘅默契。佢哋離開時，梁愛詩成為採訪對象，伍淑清就自動波幫詩姐拎住啲個人物品，等詩姐可以輕鬆、雍容咁接受訪問。
伍淑清幫詩姐（右）拎嘢，又撳定電梯，兩人互動極有默契。
咁都未算，伍跟住仲一個箭步走去電梯撳定掣，詩姐就好整以暇同記者講多兩句，然後轉身走入電梯，呢個時候，只見伍淑清為咗詩姐順利進入電梯，用手攔住電梯道門，當詩姐步入電梯後，即時向伍報以微笑，兩人齊齊離開。
睇見佢哋真係要講句政圈都有真心朋友！其實，佢哋兩個背景相近，又經常喺北京出席各種會議，孖公仔得多，默契亦水到渠成喇。
