政壇：熊運信見完京官封口

律師會啱啱上演六國大封相，前會長林新強（Ambrose）早前發表力撐「一國兩制」白皮書嘅言論惹嚟爭議，結果搞到畀人提不信任動議並獲通過，Ambrose事後自行宣布辭職，原本諗住下年先接任嘅副會長熊運信（Stephen），因而提早坐正做會長。

設計圖片及對白

「倒林」律師搞關注組

尋日，新上任嘅佢首次擔大旗，率領律師會一眾理事同京官會面，Stephen會後面對傳媒時小心翼翼，差在未封口、上拉鏈，究竟佢係費事失言惹禍，定係頭炮求穩呢？消息指，Stephen最快下周三會第一次以會長身份同傳媒茶敍，到時又睇吓佢有乜新招！

新會長慎言，但律師會內嘅風波就可能陸續有來，據聞，當日發起不信任林新強行動的律師任建峰（Kevin）等，有意成立關注組，留住一班「倒林」律師做好監察工作，可見Stephen真係要打醒十二分精神！

Kevin等人有意成立關注組嘅念頭，據講源自前年反國教成立嘅國民教育家長關注組，因為家長關注組會深入校園，教育下一代，因此呢個業界關注組，亦可能由年輕律師製作教材，向新一代播種講解法治、司法獨立嘅重要性。

另外，律師會尋日亦有一消息公布，就係選出○五年加入理事會嘅彭韻僖（Melissa）成為新任副會長，佢亦係律師會成立一百零七年以嚟首名女副會長。據知，Melissa嘅對手係專打遺產官司嘅馬華潤（Billy），最終對方喺得票上輸咗。

資料顯示，Melissa做過兩屆委任區議員，又獲政府委任多項公職，可以話係新一代「公職王」，今年仲係香港青少年軍事夏令營籌委會主席，有相當政治歷練。