政壇：稅局吼實IT巨企免費餐
大公司福利好，譬如美國硅谷科技巨擘Google、facebook同Twitter咁，會為員工提供免費食物，豐盛嘅自助餐同Pizza可以話係指定動作，恨死好多打工仔啩？點知呢個慷慨福利同業界文化，竟然畀美國稅務局（IRS）盯上，認為呢啲「免費午餐」應該屬於應稅福利，考慮加大力度追收稅款，可能相當於食物市價嘅百分之三十。
擬僱主膳食優先徵稅
其實，美國稅務局想向呢方面開刀已經唔係新鮮事，IRS同美國財政部上個禮拜整咗份最新財政年度優先徵稅項目名單，排頭位嘅正係「僱主提供膳食」。
當局仲話，會就此發出新指引，但冇透露時間表或指引內容。有意見認為，由企業提供免費食物而毋須課稅，會對經濟造成扭曲，並且為部分僱主帶來不公平優勢。不過，若果美國稅務局真係出手，肯定會畀人話係對關鍵行業特有文化嘅一種干預，勢引發「民怨」。
其實，僱主為員工提供食物，除咗係一種福利、促使員工交流同有助士氣之外，亦有更實際嘅考慮，包括可以讓員工僅花二十至三十分鐘用餐，之後便可回到工作崗位，部分企業亦可能希望避免員工喺其他食肆談論公事，可以話係互惠互利。
