政壇：搞搞政：拒選超級議席 Tanya玩殘公文袋
唔少政黨已開始為明年區議會選舉布局，尤其係如果有意喺一六年立法會選舉參選超級議席嘅話，更必須喺區選拎到「入場券」。公民黨（公文袋）陳淑莊（Tanya）雖然連任港島區直選失敗，但近年熱衷於話劇等文化工作，成日曝光，該黨有意叫Tanya轉戰超級議席，但據聞Tanya扭扭擰擰，堅持繼續參選港島區，寧坐實呢個鐵議席，都唔想危危乎闖超級議席。
設計圖片及對白
公文袋原本就鎖定港島中產區杏花邨畀Tanya出選。該區本來由泛民陳添勝長期坐鎮，但佢喺一一年區議會選舉時爆出騙取津貼醜聞，結果輸咗議席。但該區一向係泛民票倉，白鴿黨亦已同公文袋協調好，如果公文袋想派人出選，佢哋願意讓路喎。點知Tanya就喺黨內會議明言唔制，外界就猜測Tanya因為在一一年區議會選舉輸咗畀自由黨陳浩濂，怕再輸多次。再講，就算贏到區議會議席，亦未必一定可以喺立法會選舉超級議席脫穎而出。所以Tanya縮沙，捲土重來爭港島區直選，仲穩陣啲。
陳家洛個位凍過水
呢一着打亂公文袋布局，佢哋計劃，如果Tanya肯選超級議席嘅話，公文袋喺立法會選舉就可以騰出港島區一席，令今屆靠Tanya抬轎而跑出嘅陳家洛可以競逐連任，但依家Tanya唔肯轉戰超級議席，令陳家洛嘅議席凍過水，睇嚟公文袋都係要重新部署喇。
