SUN搞作：打橫嚟講：香港特區差人「笨」實錄

第一條片，係見「熱血公民」成員在亞洲國際博覽館外示威時，被差人隔住鐵馬三噴胡椒噴霧。

第二條片，係有兩個差人與一個手抱嬰孩的私家車司機嗌交，男司機不斷用粗口X爆那手握警棍的差人A，除問候佢娘親外，仲嘍佢隻揪，鬧足兩分多鐘，同僚差人B卻在旁擾擾攘攘，無幫拖，也無行動；而被人X爆老母的差人A顯得不知所措，只淨係識向勸交的途人「申訴」，很委屈的說「佢用粗口鬧我呀！」「佢鬧我呀！」唉！成碌葛咁！

第三條片，係呢輪頻頻現身，以「行為藝術」抗篩選撐佔中的藝術家歐陽先生，繼「反佔中遊行」那日「食狗糧」、「佔中登山日」全程笠住個膠袋，喻抗議「袋住先」後，前日，用紅膠紙貼唇，手持示威紙牌，喺政總門口「呆遊」時，幾個差人上前「逗」佢，問佢使唔使睇醫生，以為佢「神經病患者」，好明顯呢班差人無留意新聞，無common sense，唔知佢乃大名鼎鼎的藝術界明星級人馬也！最後，歐陽先生以「裸露抗暴」（嗱！佢下身有着「奀打」的），被警方拘捕了！

看此三段「真人騷」，見差人在人多勢眾時的兇狠（向手無寸鐵的年輕人噴胡椒噴霧），亦有在人少時便變「小學雞」般口震震的鵪鶉相，和無常識但有權行使暴力的一羣「合法施暴者」，真有點不安！咁嘅質素，點執法，可保護市民呀？回歸前，香港皇家警察衰極都有威嚴、有分寸，辦事能力強吖！家陣，不單只有黑影，仲形象大跌，受市民唾罵！

八月三十一夜，由添馬艦公園至君悅酒店那段港灣道，全程差人都肩並肩的排得滿滿封路，靠人多辦事？定係壯膽呢？準備以十個打一個對付遊行人士嗎？咁無料到，不如喺街邊扮小丑氹人開心便算吧！

申報：我最支持有腦嘅警察的！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府