政壇：金融調解中心CEO 詹少弘突唔撈
因為雷曼迷債事件而觸發成立嘅金融糾紛調解中心，一二年中先正式開幕，但接獲嘅調解服務申請個案唔算多，中心成立以來都幾低調。近日，中心嘅CEO（行政總裁）詹少弘卻忽然傳出唔撈嘅消息！原本詹少弘嘅任期應該到明年三月，換句話講，呢個中心首任CEO做唔完任期就離職喎。點解呢？金融糾紛調解中心位發言人只係話，有關離職係詹少弘同董事局商討後的安排。對於因乜原因突然離職，就不作評論。
詹少弘任期未滿，便忽然劈炮離開金融糾紛調解中心。（資料圖片）
離職啟事特別聲明
上個星期五，金融糾紛調解中心網站突然出咗詹少弘離職啟事，表示佢已於當日離職，但最特別都要算份聲明表示：「今後詹少弘在外之一切華洋轇輵，概與本中心無涉，特此聲明。」呢個聲明一出，梗係引人注意喇，點知中心方面並冇多嘅補充。
詹少弘係大律師，二○一二年三月被委任為金融糾紛調解中心首任CEO，任期三年，即係話明年三月至到期。中心發言人話已物色緊接任人，暫時管理層會處理有關工作。中心個網站就顯示，佢哋已經喺八月十八日登載公開招聘行政總裁。
金融糾紛調解中心主要工作係以「先調解，後仲裁」方式，協助解決金融機構與客戶之間的金錢爭議。
