水署釀水浸賴死唔賠
【記者呂耀焜報道】水務署工程失誤令住宅大廈全層水浸，賠償拖延逾年仍未付分毫！鴨脷洲漁安苑去年六月進行水錶更換工程，期間卻因水掣鬆脫導致全層淪為澤國，受影響住戶就損毀家具及電器向水務署索償，惟事隔一年公正行仍未就事件提交報告，令索償石沉大海。業界直指情況罕見，區議員則狠批水務署未有積極跟進賠償，做法不負責任。
區諾軒指涉事單位下層住戶同受波及，天花出現水痕（紅圈示）。
周氏夫婦指公正行遲遲未有提交報告，一年後仍未收取分毫賠償。
樓下住戶曾就賠償金額作出建議，惟公正行未置可否。
「嗰朝返到嚟啲水浸到成屋都係，差唔多兩、三吋咁深，因為淨係得廚房同廁所有去水位，結果嗶水嗶都咗成幾個鐘，搞到周身骨痛！」居於漁安苑的周先生指出，水務署去年六月為所住樓層更換水錶，未料安樂窩卻因此而「淹沒」，損失慘重，「成屋啲木傢俬就浸到發脹，搞到啲榫位唔對，開唔到櫃，仲浸壞咗部抽濕機同手提電腦！」
事隔一年冇聲氣
周先生事後就「水災」所造成的損失向水務署索償，未料一年後仍然「冇聲冇氣」，「水務署成日話要等公正行出報告先有得賠，公正行上過嚟幾次，影完相就係冇晒下文。」而居於下層的余先生直言亦受影響，單位天花經水浸一役後發霉，曾向公正行提交索償建議，不滿至今仍石沉大海，「我有填過表畀公正行，話畀佢知要整幾錢，但係佢哋冇覆過我究竟接唔接受我講嗰個金額。」周對水務署的處理方法感不滿。
「出咗事之後水務署好快就承認責任，應承話會賠錢，但拖咗成年幾都仲未知賠幾多、同埋幾時有得賠！」一直協助居民索償的當區區議員區諾軒，批評水務署未有責成承辦商早日交代賠償事宜，令到居民大感索償無期，「公正行都上咗嚟幾次，但係冇人知佢哋仲想要啲咩資料，好多居民都驚仲有排拖。」
水務署發言人證實，去年在涉事樓層進行舊水錶更換工程，期間因水掣掣頂突然鬆脫，以致食水流入住宅，事後接獲共七戶住戶索償，由於涉事意外屬保險保障範圍，承辦商已轉交保險公司處理，為配合個別住戶時間安排，公正行於今年七月方完成實地視察及於七月底作出賠償建議，已交由保險公司審批。
「公正行個角色係睇番件事係咪保險保障範圍，仲有擬定賠償金額，但成年先出到報告嘅情況都幾誇張。同埋每戶都係獨立個案，唔使話睇晒所有人嘅情況先處理到。」香港公正行技術總監賴達明認為，公正行一年後方提交報告情況罕見。賴建議住戶應先自行拍照紀錄，減少日後索償時發生爭拗。
熱線3600 9988
電郵 socserv@on.cc
傳真3600 9900
WhatsApp/SMS 6500 6500
來函請寄：香港大埔工業邨大昌街２３號東方報業中心東方報業集團投訴組收
個人資料絕對保密
匿名投訴恕不處理
