城中鏡：林凱章飲酒累腳患復發

養傷有法，戒口唔少得。立法會議員林健鋒位公子林凱章（Victor），早前踢波受傷，出入都要拐杖協助，尋日喺一個場合見到佢，發現佢恢復得唔錯，已經西裝骨骨、拐杖遠離佢，點知Victor自爆，佢早前一時大意，同朋友食飯時飲咗半杯紅酒，搞到腳患復發，傷口又腫過，依家佢知道戒口好緊要，連食飯都清淡好多。

林凱章早排踢波傷咗腳，本來康復良好，點知飲酒又累事。

Victor一向鍾意踢波，世界盃期間佢都波癮起，點知熱身唔夠，搞到左腳受傷，據講要休養一年，依家佢每個禮拜要做兩次物理治療，做嘅時候要活動腳踭，痛楚又來襲。

搞笑嘅係，佢爸爸見個仔咁凄涼，就游說個仔跟佢打高爾夫，同樣係運動，但用手同用腳差好遠，不過，Victor就似乎唔捨得個足球。點都好，佢依家傷患未愈，有排都唔掂得個波，諗乜都冇用。