剛過去的一個月，是本港自一八八四年有紀錄以來最熱的七月，家家戶戶電費飆升，劏房租戶竟更要「捱貴電」﹗早前有團體調查發現七成劏房業主「賣貴電」，本報與一批劏房租戶接觸，發現業主奇招盡出「掠水」，包括在租約隱瞞每度電收費，以便自行定價；不安裝獨立電錶，租戶被迫攤分電費，甚至有租戶懷疑電錶被「做手腳」；更有甚者，有劏房租戶向業主繳交的每度電收費，竟高出電力公司的平均總電費水平逾六成，變相轉售電力圖利。事件足見當局監管不力，劏房業主有恃無恐，租戶百上加斤。
馮女士懷疑電錶遭人做手腳，以致多交電費。
黃太的業主向她收取每度電一元八毫，遠高於中電收費逾六成。
有劏房業主留空租約的「電錶度數」一欄，令租戶大感無奈。
促立法規管
張小姐（服務業）：電費係市民大眾必要開支，應該一視同仁，政府最好立法規管電費收費，幫輕吓劏房戶。
麥先生（大專生）：住得劏房嘅都係啲窮人，仲要收咁貴電費，對佢哋真係好唔公平。除咗立法，政府亦都可以提供電費減免津貼畀佢哋。
個案1：電錶疑做手腳 慳住用都咁貴
「為咗慳錢，我哋都慳住用電，冷氣機都係瞓覺前先開一陣就熄咗佢，平時就開風扇，唔知點解電費會咁貴。」劏房戶馮女士與兩名年幼子女，同住約一百一十平方呎的劏房單位，惟近日發現電錶跳動異常，業主所講的用電量與實際用量不符。
最近兩個月，她共要繳交電費五百多元，又察覺電錶的轉動速度特別快，因此懷疑電錶被「做手腳」，「同隔籬錶相比，轉得特別快，不過我自己唔識得睇錶，都係業主講幾多就畀幾多。」
個案2：鄰戶人數多 同費不公平
為免麻煩或省時省費，部分業主不會安裝獨立分錶，令劏房戶繳交電費時，被迫與鄰戶攤分。「隔籬單位住咗一家五口，我就一家三口，人哋梗係用電用得多過我，但大家都係交咁多電費，係咪唔公平先？」剛獲派公屋的李女士與家人，之前一直租住一劏三的單位，另外兩個單位分別是獨居婆婆及五口家庭。由於單位沒有分錶，每期電費都是一除三，她對此大呼無奈：「我有叫過業主裝分錶，不過佢一直唔肯理，我哋又可以點？」
個案3：月月「皇榜」發布 每度電海鮮價
「業主一向無講清楚每度電收幾錢，直至上期電費貴過平時，我哋一計之下先知每度電收一蚊八毫，貴過中電六成幾，咁樣對我哋好唔公平。」黃太一家四口租住葵涌區一個僅九十平方呎的劏房單位，月租三千七百元，依靠從事地盤散工的丈夫養家，生活拮据。惟她想不到不但要「捱貴租」，還要「交貴電」。
每次繳交電費，黃太的業主都會把每戶的用電量及總收費寫在紙上，然後貼在單位門外，不過每次定價不一，最近一期的電費每度電約一元八毫。根據中電住宅客戶用電收費，平均電費是每度一元一毫，換句話，黃太繳交的費用高出中電定價逾六成多。
「劏房租戶都係普通市民，大家都係用中電提供嘅電，點解我哋住劏房就要畀貴啲？」黃太向記者展示租約，雖然租約上寫有「電錶度數」一欄，但業主在簽約時卻刻意留空，令黃太大嘆無奈，最終她亦只能按時繳費，以免「自食其果」，「就算我哋覺得唔合理都無辦法，唔交一係無電用，一係連住都無得住。」
議員轟監管不力
對於劏房租戶任人魚肉，立法會議員張超雄亦炮轟當局監管不力，「當局唔可以話無例可依而敷衍了事，每戶嘅每月電費好似係小數目，但對於劏房呢批低收入人士嚟講就係大數目。」
第一手消息請下載on.cc東網張凱恩
