政壇：騰雞美華賴死11年
是非多多嘅民政事務總署又惹火頭！人稱「騰雞美華」嘅總署署長陳甘美華自○三年「坐正」後，坐吓三年又三年，唔經唔覺已經接掌總署十一個年頭，總署一班聯絡主任除咗不滿佢賴死唔走外，尋日仲特別去信公務員事務局局長鄧國威，投訴總署「翻閹」兩位退咗休嘅前總聯絡主任同前高級聯絡主任，仲為兩人度身訂造合約制職位，矛頭直指署長騰雞美華。
設計圖片及對白
違反AO調動常規
兩個涉獲翻閹嘅同事目前都係任職總署項目經理，投訴人不滿總署嘅所謂招聘閉門造車，安排明益自己友，既無助長遠增加總署人手，仲窒礙聯絡主任內部升遷添！加上二人除咗每月穩袋退休金，仲逗埋新工份糧，有違《公務員事務規例》之嫌喎。
投訴人又不忘指控陳甘美華掌管總署多年依然不升不調，違反晒政務主任（AO）每三、四年一調嘅常規，質疑係咪有hidden agenda ，即係另有內情或有隱秘嘅動機。佢哋仲將電郵副本傳畀騰雞美華本人，連特首辦、民政事務局副局長許曉暉等多名局方官員都收到，無懼家醜傳千里。
借公開招聘擋箭
我哋就騰雞美華坐足十一年問過公務員事務局，當局只係話調動政務職系人員時，會考慮部門同政府整體運作需要等因素，唔同職位任期都唔同，唔評論個別職位安排。而總署就為翻閹風波解畫，指兩個項目經理職位都屬臨時性質，分別幫手統籌「十一」慶祝活動，同二○一五年村代表/街坊代表選舉。總署又話兩個職位都係公開招聘，亦唔係以公務員條款聘任，唔會影響聯絡主任職系內部升遷。
總署同事收唔收貨係一回事，但一封「鬼信」就足證騰雞美華不但無力幫政府掌握民情，連下屬有咁大怨氣都平息唔到兼被反咬一口，所以佢咁多年都坐住呢個位係有原因嘅。
