政壇：王恒花8年物色CEO

百貨連鎖店金鷹上半年純利時光倒流至一○年，但董事長王恒仲好淡定，對未來業績「比較樂觀」，可能同搵到啱心水嘅CEO有關。所謂「工欲善其事，必先利其器」，呢位新CEO蘇凱做開電子商務同O2O業務規劃，曾任三福百貨CEO、IBM全球企業諮詢服務部南京分公司總經理，明顯為O2O業務平台打靚個底。

王恒

聽落好誇張，原來金鷹CEO個位懸空咗好耐。上一任CEO喺○八年因個人事業發展只係做咗半年就走，難怪尋日王恒突然好感慨咁話，「做電商考慮了八年，搵CEO也足足找咗八年」，即係話金鷹喺○六年上市時已經開始物色CEO。對於蘇凱加盟金鷹嘅經過，蘇凱笑言「機緣巧合」，仲強調自己同王恒對電商等看法不謀而合。

金鷹今年開實體店預算Cut成十億人仔，搞電商似乎萬事俱備，不過，王恒仲未肯透露推出O2O業務嘅實際時間表，淨係話依家發展電商模式會係小規模同針對VIP客戶，唔會燒錢搞。蘇凱亦講明自己唔鍾意講長期戰略，短期任務透過整合資源解決業務問題、拉開同行差距。