SUN搞作：少膽虫手記：害己害人
「虫不喜歡孤單一個，可惜偏偏孤獨一個……」少膽虫凌晨時分拎住電筒，獨巡熄晒燈嘅壹全霉大樓，天氣雖未涼，寒意卻入心，或者因為壹全霉壞事做盡，我心中有鬼……睇到呢度，你一定會問，點解虫哥我要撈埋實Q？唉，咁就要講番尋日喇……
「虫，我決定編輯部全體減人工，愈高級愈減得多，你準備食粥水啦！」淫賤黎喺例會又發晒窮惡，今次仲搵編輯部開刀，班細嘅乞米冇所謂呀，搞埋我仲得了嘅？「腦細，減人工會重創士氣，影響作新聞水準o架！」淫賤黎以炮製假新聞為樂，一聽果然動搖：「咁你有乜縮皮建議先？」本虫情急下求其畀橋：「腦細，壹全霉日日浪費咁多燈油火蠟，又唔見得起死回生，今日起就實施停電措施，環保為名，慳錢為實呀！」
淫賤黎肥頭一昂，淺露笑容，我已經知道掂咗一半，即時再落藥：「壹全霉低三下四，真係賊都唔吼，夜晚熄埋燈，包保鬼都唔飄入嚟，趁今次順便炒埋啲保安，咪又慳一筆囉！」淫賤黎諗呀諗呀成副諗樣，終於為方案拍板，點知我就捉蟲：「一個保安都冇唔得嘅，阿虫，以後收工你就換件保安衫，單刀睇住個場啦！」
