城中鏡：AO歌王唱贏成班CEO
為咗陪伴一班年輕人追夢，城中十五位CEO前晚參加咗「與CEO對唱」一決高下。為爭勝，班CEO各出奇謀，鬥足一晚難分難解，最後由有「AO歌王」之稱嘅民政事務局前常任秘書長Raymond楊立門同拍檔潘伯仲以一曲《愛是永恆》奪冠。至於賽前胸有成竹嘅香港大學醫學院院長Gabriel梁卓偉，佢同拍檔陳霆瑋合唱一曲《追》就未有獲獎。
楊立門（右）同潘伯仲只夾過兩次歌但默契十足，輕易憑一曲《愛是永恆》奪冠。
彭徐美雲（左）煲埋花旗參水畀拍檔劉煒彤（右）養聲，齊奪得對唱賽季軍。
梁卓偉（右起）、莊偉茵同保險公司高層湯寶寶喺台上較量。
為奪冠做足功課
喺幾百人面前獻唱，班CEO表演水準仲咁高，背後做足功課。休假中嘅Raymond索性請拍檔返屋企食「住家菜」，順便練歌。女童軍前香港總監彭徐美雲都唔執輸，出動私伙花旗參水畀拍檔劉煒彤「養聲」；佢老公彭曉明仲勁，想話拎支人參畀拍檔韓照昌補吓氣，但最後驚太補流鼻血，都係咪搞嘞！
中電企業發展總裁Quince莊偉茵最大陣仗，請嚟以前喺國泰工作時合組隊Band「YOUNG ONCE」晒冷，合作天衣無縫，可惜最終落敗，Quince話最緊要好玩，勝負唔重要喎。至於Gabriel就旺人唔旺自己，同拍檔陳霆瑋合唱一曲《追》未有獲獎，但陳霆瑋轉頭喺個唱環節就奪得亞軍。
參賽者獲CEO賞識
眾CEO喺台上施展渾身解數，瑞士寶盛銀行中國及香港區董事總經理施國榮嗰隊得第二名，季軍就由彭太隊伍奪得。「歌手一號」歌唱比賽搞手兼大家樂集團主席陳裕光話，樂見唔少青年參賽者與CEO成為好友，當中更有人被CEO賞識，獲安排新工作，亦有人獲邀出席演唱會嘉賓。個個追夢成功，確係飲得杯落。
