政壇：蕭偉強夫婦手揸三層樓

之前都講過勞工及福利局局長張建宗同太太喺香港合共持有九個物業，因而外號叫「官場樓王」。但原來佢嘅下屬、勞福局副局長蕭偉強都唔輸蝕，本港都有三個物業揸手。唔知佢哋得閒嘅時候會唔會傾吓香港樓市、交流吓投資置業嘅心得呢？

蕭偉強

上任未夠半個月嘅蕭偉強，近日提交咗財務及其他利益登記資料。佢申報同任職高級人力資源經理嘅太太鄧綺文，合共持有三個九龍區嘅住宅單位，有別於鍾情港島區嘅張建宗。當中兩個單位喺九龍城區，一個係兩公婆嘅自住單位，另一個就由佢持有、供家人居住。此外，佢太太就喺油尖旺區持有另一個住宅單位，亦都係畀家人居住。