政壇：莊陳有淋冰 籲市民行善
喺「冰桶挑戰」人人要找數嘅熱潮下，香港肌健協會近日破天荒籌得逾九百萬元捐款，聽日要特別開會研究善款用途，而善款仲陸續有嚟。失明人協進會會長莊陳有尋日都接受挑戰，仲特別選址路邊花叢找數，唔知係咪有感冰水流落花叢，應該會環保啲呢？佢喺社交網站話希望透過自淋冰水，呼籲大家繼續關注「漸凍人」等長期病患者嘅權益，同時支持其協進會工作。
莊陳有選擇在路邊花叢自淋冰水「找數」夠環保。（互聯網圖片）
此外，香港肌健協會早前向長實主席李嘉誠下「戰書」，希望佢接受冰桶挑戰兼捐款支持協會工作。不過，我哋翻查李嘉誠基金會網頁，發現基金會過去多年均有資助該協會，毋須等到冰桶挑戰先行動。
李嘉誠基金會主辦嘅「Love Ideas, Love HK集思公益計劃」自一○年起三個回合，香港肌健協會都有愛心項目獲選，包括資助肌肉萎縮症患者呼吸機租金開支嘅「救人一命$50」；為患者及時提供資助購買干擾素、減少永久殘障出現嘅「見殘早見計劃」；以及資助病人購買物理治療服務開支嘅「肌萎愛運動計劃」，每個回合都獲基金會資助三十萬元，即合共獲得基金會資助九十萬元。
