城中鏡：陳嘉容跟好友學整月餅
就嚟又到中秋節，月餅款式多籮籮，唔知揀邊款？咁有冇諗過好似名模Eunis陳嘉容咁，自己整餅呢？
陳嘉容學整月餅，全部都低鹽低脂低油好健康。
Eunis今年出任醫學美容代言人，加上頻頻返內地舉行美容扮靚講座賺人仔，荷包自然腫脹不少，趁中秋節將至，佢就豪花五位數字幫襯老友Shanice嘅餅店訂購名貴月餅同摯愛親朋分享，仲親自跟Shanice學整月餅，Eunis話：「啲月餅好特別，四款都係鹹嘅，有黑松露、魚子醬、黑毛豬同埋XO醬，而且全部都低鹽低脂低油，好健康。」
首次學整月餅嘅Eunis絕對冇雞手鴨腳，全程製作得有板有眼，睇嚟對整餅相當有天分。每年中秋Eunis都會同家人歡度佳節，今年亦唔例外，佢話：「中秋節要人月兩團圓，同家人一齊慶祝就最開心，不過當然都希望我嘅真命天子早日出現，陪我人月兩團圓啦，咁就最圓滿同幸福喇。」
