淨化海港變污化 升級工程豆腐渣

咪以為講笑呀，屯門望后石污水處理廠日前突然發生故障，導致九萬五千立方米未經處理嘅廁所污水排入大海，屯門及荃灣十四個泳灘需要緊急關閉。渠務署係咁講嘅，因為望后石污水處理廠內嘅「幼隔篩裝置」，四個全部同一時間斷鏈，令沉沙及化學處理步驟未能進行，未經處理嘅污水原本儲存喺儲水池，點知儲水池滿瀉，惟有將污水透過緊急深海排放管排放到七百米以外嘅深海水域咁話。

嗱，四個隔篩同一時間跪低，其中一個仲係後備隔篩添，唔止專家難以置信，連渠務署都承認事不尋常。如果話機組老化先至出現咁嘅問題，或者仲勉強講得通，之但係渠務署今年五月至斥資十四億五千萬元完成升級工程，將污水廠由基本處理提升至化學強化一級處理加消毒，家陣升級唔夠三個月就出事，簡直匪夷所思，難怪連立法會議員都質疑升級工程係豆腐渣喇。

即係咁，污水流入大海，唔止污染環境，市民游水仲分分鐘感染大腸桿菌甚至皮膚病，你話係咪大整蠱吖。渠務署仲懵盛盛，聲稱唔清楚機件故障原因，已要求承建商提交報告喎。喂，污水處理廠係由渠務署負責監管嘅，出咗事就推晒畀承建商，點都講唔通啦。講到尾，渠務署後知後覺，冇監冇管，先至係罪魁禍首。呢，類似事件已經唔係第一次喇，早年赤柱正灘污水泵房及東頭懲教所小型污水處理廠都發生過洩漏事故，搞到多個泳灘被迫關閉，今次不過歷史重演咋。你話嘞，渠務署咁多年都冇吸取教訓，係咪抵鬧吖！

講開又講，污水處理係淨化海港計劃嘅一部分，呢個計劃原意係好，亦的確令維港水質大大改善，但港產官僚搞環保甩甩漏漏，亦係不爭嘅事實。連審計署都曾經批評，渠務署批出淨化海港計劃嘅工程合約出現多處失誤，搞到工程延誤超支，仲引起連串仲裁添。其實唔止渠務署，環保署一樣求求其其嘅咋，去年打鼓嶺堆填區啟用數月嘅臨時滲濾污水儲存池出現滲漏，搞到污水流入缸窰河，環保署仲要隱瞞成個月先對外公布，問你服未。

大事做不成，小事做不了，港產官僚搞環保注定甩漏多多，一事無成。咪話太一叮唔提醒，今次污水處理廠跪低，對環境未至於造成太大影響，但如果港產官僚再唔打醒十二分精神，遲早爆大鑊嘅咋，叮！